АНУ-ын Эрчим хүчний сайд Крис Райт "Financial Times" сонинд 2025 оны есдүгээр сарын 8-нд нийтлэгдсэн ярилцлагадаа "Хэрэв Европын орнууд тодорхой хил тогтоож, 'Бид Оросын хий, нефть авахаа болино' гэж мэдэгдвэл АНУ-ын хориг арга хэмжээг илүү хатуу болгоход эерэг нөлөө үзүүлнэ. Энэ бол маргаангүй" гэжээ.

Крис Райтын үзэж буйгаар, ОХУ-ын эрчим хүчний эх үүсвэрийг АНУ-ын шингэрүүлсэн байгалийн хий (LNG), бензин болон бусад эрчим хүчний бүтээгдэхүүнээр орлуулах боломжтой аж. Тэрбээр үүгээр дамжуулан:

• Европын Холбоо, АНУ-тай байгуулсан худалдааны гэрээний дагуу
• 2028 оныг дуустал нийт 750 тэрбум ам.долларын эрчим хүч худалдан авах үүргээ биелүүлэх боломжтой гэж үзжээ.

Райтын тайлбар: Ингэснээр Оросын дайны санхүүжилтийг тасална

АНУ-ын Эрчим хүчний сайд цааш нь "Бүгд дайсагнагч орноос бус, найдвартай, түнш орноос эрчим хүч авахыг хүсдэг" гэж мэдэгдээд, Европын орнууд Оросоос эрчим хүч худалдаж авахаа зогсоовол

• ОХУ-ын дайны машин (цэргийн үйл ажиллагаа)-ыг санхүүжүүлэх хөрөнгийг таслах
• Үүний үр дүнд Украин дахь дайн дуусах хугацаа ойртоно хэмээн үзэж буйгаа илэрхийлжээ.

Трамп болон Сангийн яамны байр суурь

АНУ-ын ерөнхийлөгч Дональд Трамп есдүгээр сарын 7-нд ОХУ-ын эсрэг шинэ, илүү хатуу хориг арга хэмжээ авахад бэлэн байгаагаа мэдэгдсэн. Мөн АНУ-ын Сангийн сайд Скотт Бессент "АНУ болон Европын нэмэлт эдийн засгийн дарамт нь ОХУ-ын Ерөнхийлөгч Владимир Путиныг Украинтай энхийн хэлэлцээ хийхэд хүргэж магадгүй" гэж үзэж буй юм.

Эх сурвалж: DW
Б.ЖАРГАЛ