Перу улсын төв хэсэгт өнгөрсөн бямба гарагт буюу 2026 оны долоодугаар сарын 18-ны өдөр болсон 5.5 магнитудын хүчтэй газар хөдлөлтийн улмаас зургаан хүн амиа алдаж, 30 гаруй хүн бэртэн, 300 орчим иргэн орон гэрээ орхин дүрвэхэд хүрсэн талаар тус улсын эрх баригчид мэдээллээ.

АНУ-ын Геологийн албаны мэдээлснээр газар хөдлөлт орон нутгийн цагаар бямба гарагийн орой болсон бөгөөд голомт нь Хуанкайо мужийн Сикая хотын баруун өмнөд хэсэгт, газрын гадаргаас 10 километрийн гүнд бүртгэгджээ.

Гамшгийн улмаас олон арван орон сууц, барилга байгууламж нурж, зарим нь ноцтой эвдэрсэн байна. Мөн 1565 онд баригдсан, үндэсний түүх, соёлын өвд бүртгэлтэй Сантьяго де Леон сүм болон хуучин хийдийн барилга ихээхэн гэмтжээ. Перугийн Иргэний хамгаалалтын үндэсний хүрээлэнгийн мэдээлснээр сураггүй болсон хүмүүсийн тоо одоогоор тодорхойгүй байгаа бөгөөд аврах ажиллагаа үргэлжилж байна.

Орон нутгийн Иргэний хамгаалалтын газрын дарга Луис Васкесийн хэлснээр тухайн бүс нутагт уламжлалт шавар тоосгон барилга зонхилдог нь газар хөдлөлтийн үеэр хохирол их гарахад нөлөөлжээ. Хамгийн их өртсөн Чонгос-Бахо тосгоны иргэд гэр орон нь нурсан тул гадаа хонож, нуранги дор дарагдсан эд зүйлсээ аврахаар ажиллаж байгаа аж.

Перу улс Номхон далайн "Галт бүс"-д оршдог учраас газар хөдлөлт тогтмол тохиолддог орнуудын нэг юм. 2007 онд тус улсын Писко хотын орчимд болсон 7.9 магнитудын хүчтэй газар хөдлөлтийн улмаас 600 орчим хүн амиа алдаж байсан түүхтэй.