Украины Ерөнхийлөгч Владимир Зеленский “ОХУ руу авч явсан, Украины "хулгайлагдсан" хүүхдүүдийг эх оронд нь буцаах асуудалд Австри улс зуучлагчийн үүрэг гүйцэтгэж чадна” гэж мэдэгджээ.

Тэрбээр Австрийн Ерөнхийлөгч Александр Ван дер Беллентэй Вена хотноо уулзах үеэрээ энэ талаар ярьсан бөгөөд зургадугаар сарын 16-ны даваа гарагт болсон хамтарсан хэвлэлийн бага хурал дээр ч мэдээлсэн байна.

Украины төрийн тэргүүн сэтгүүлчдэд “Оросын тал Украинд сануулга өгч, ОХУ-д аваачсан хүүхдүүдийг Оросын олзлогдсон цэргүүдээр солих санал тавьсан. Бид хүүхдүүдийг олзны цэргүүдээр солихгүй. Энэ ойлгомжгүй зүйл. Энэ бол олон улсын эрх зүйн хүрээнээс гадуурх зүйл, тэдний (Оросын) сэтгэлгээнд л байж болох зүйл" гэж онцолжээ.

Мөн Зеленский Австрийн Ерөнхийлөгч Ван дер Беллен болон Канцлер Кристиан Штоккер нартай уулзахдаа Европын холбооны ОХУ руу чиглэсэн 18 дахь хориг арга хэмжээний багцын бэлтгэл, Оросын талтай хийх уулзалтуудад Австрийн "зохистой зуучлал" үзүүлэх бэлэн байдал зэрэг сэдвүүдийг хэлэлцсэн тухай дурдсан байна.

Зеленский өөрийн цахим хуудастаа "Бид манай орны сэргээн босголт, мөн Украины хууль шүүхээс зугтаж буй хуучин албан тушаалтнууд болон олигархиудын асуудлыг шийдэхдээ Австрийн дэмжлэгт найдаж байна” гэж бичжээ.

Украиныг дэмжихээ илэрхийлсэн Ван дер Беллен "Австри улс цэргийн бус, харин улс төрийн саармаг байр суурь баримталж байна” хэмээн онцлоод, энэ хүрээнд Европын Холбооны ОХУ руу чиглэсэн бүх хориг арга хэмжээнд нэгдсэнээ хэлсэн байна.

Владимир Зеленский Вена хотод хэдэн цаг саатсаны дараа Канадад "Их долоо"-гийн дээд хэмжээний уулзалтад оролцохоор морджээ. Түүний хэлснээр, энэ удаагийн уулзалтаар АНУ-ын ерөнхийлөгч Дональд Трамптай Киев Америкийн зэвсэг худалдан авах асуудлаар ярилцахаар төлөвлөж байгаа бөгөөд АНУ-аас үзүүлэх цэргийн тусламж энэ удаад хэлэлцэх сэдэвт багтаагүйг дурдсан байна.

Эх сурвалж: DW
Б.ЖАРГАЛ