НИТХ өнгөрсөн долоо хоногийн баасан гаригт хуралдаж, хотын даргын томилгоог хэлэлцэх байсан ч ирц нь бүрдээгүй. Улмаар даваа гаригт үргэжлүүлэн хуралдахаар цаг товлосон ч ирц бүрдээгүй тул хурлын товыг бүр цуцалсан юм. Ингэснээр НИТХ-ын тэргүүлэгчид дахин хуралдаж, НИТХ-ын товыг зарлах хүртэл хотын даргын томилгооны асуудал хэлэлцэгдэхгүй байх нөхцөл байдал үүсэв.

НИТХ хэзээ уг асуудлыг хэлэлцэх талаар НИТХ-ын ХМОНХТ-ийн дарга Ц.Мөнхбаатараас тодруулахад “НИТХ-ын Тэргүүлэгчид хуралдаж, НИТХ-ын дараагийн хурлын товыг тогтох ёстой. Тэргүүлэгчдийн хурлын товыг гурав хоногийн өмнө зарлах дэгтэй тул хотын даргыг томилох асуудлыг яаралтай хэлэлцэнэ гэвэл энэ Баасан, эсвэл ирэх Даваа гарагт хуралдах боломжтой. Одоогийн байдлаар ямар нэгэн хурал зарлаагүй байна. НИТХ-ын ээлжит хурал нэгдүгээр сарын 20-доор байгаа. Үүрэг гүйцэтгэгчийг нь томилчихсон байгаа учраас хотын даргыг заавал 14 хоногт багтаан томилох ёстой гэсэн ойлголт байхгүй. Хуулиараа хотын дараагийн даргыг хэзээ томилно, тэр хүртэл үүрэг гүйцэтгэгч нь ажиллах боломжтой байдаг” гэсэн юм.

Нийслэлийн МАН-ын тэргүүлэгчид болон МАН-ын Удирдах зөвлөлөөс НИТХ-ын дарга С.Амарсайханыг хотын даргад нэр дэвшүүлэх шийдвэрийг гаргасан. Гэвч НИТХ дахь Ц.Сандуйгийн фракци болон сөрөг хүчнийхэн С.Амарсайханыг хотын дарга болохыг дэмжихгүй гэдгээ хөшигний ард илэрхийлсэн гэх мэдээлэл байгаа юм.