Япон улсын NHK телевизээр энэ хоёрдугаар сарын 09-ний өдөр “Траншейны хүүхдүүд Болд Даш хоёрын 20 жилийн түүх” нэртэй баримтат кино цацагджээ. Уг кино нь Монголын траншейнд 20 жилийн өмнө амьдарч байсан 13 настай Болд, 14 настай Даш нарын амьдралыг харуулж эхэлнэ. Баримтат киноны хоёрдугаар хэсэг 2004 онд үргэлжлэх бөгөөд Болд гэр бүл зохиож, эхнэр охин, Даш найзынхаа хамтаар амьдрах болсон байв. Харин киноны гуравдугаар хэсэг 2008 онд Болд архинд орж, эхнэр охин, найзуудаасаа салсан байна. Киноны төгсгөлийн хэсэг 2018 онд өрнөх бөгөөд хоёр найз эргэн нийлсэн, амьдрах итгэл дүүрэн, амьдралын төлөө хэрхэн тэмцэж, өнгөрсөн амьдралынхаа алдаа оноог хэрхэн дүгнэж буй талаар өгүүлнэ.

NHK телевиз баримтат киноныхоо төгсгөлийг Болдыг охинтой нь 14 жилийн дараа, Дашийг 20 жилийн дараа ижийтэй нь уулзуулж сэтгэл хөдлөм, баярт мөчөөр дуусгажээ.

Нэвтрүүлгийн багийнхан эдгээр залуусын амьдралыг тэдэнд үргэлжид санаа зовж явдаг үзэгчдийн хүсэлтээр 20 жилийн турш тасралтгүй, уйгагүй сурвалжилсан нь энэ. Одоо Болд охиноо Улаанбаатарт авч ирэн их сургуульд сургах, Даш бичиг үсэг сурч, жолооны үнэмлэх авах мөрөөдөл тээн амьдарсаар явна.