НИТХ ИРЭХ МЯГМАР ГАРИГТ ХУРАЛДАЖ ХОТЫН ДАРГЫГ СОНГОНО

Хаврын чуулган завсарлаж улс төр нам, гүм энэ цагт Хотын даргыг сонгохтой холбоотой асуудал л олон нийтийн анхаарлыг татаж байна. НИТХ-ын Тэргүүлэгчид ирэх долоо хоногийн мягмар гаригт хуралдаж хоёр дахь удаагаа Хотын даргыг сонгоно.

Өмнө нь 2019.01.16-ны өдөр хуралдаж төлөөлөгчдийн олонхийн саналаар НИТХ-ын тэргүүлэгч С.Мөнхчулууныг Хотын даргад дэмжсэн ч Ерөнхий сайд У.Хүрэлсүх батламжлаагүй.

Тиймээс 15 хоногийн дотор хуралдаж Хотын даргад нэр дэвшигчийг дахин тодруулах шаардлага үүссэн нь энэ юм. Ирэх мягмар гаригийн хуралдаанаас олонхийн дэмжлэгийг авсан хүнийг Ерөнхий сайд ажлын тав хоногийн дотор шууд батламжилна, буцаах эрхгүй.

ХӨӨСӨН, ХӨӨГДСӨН ХОЁРЫН ТАЙЛБАР

Тав хоногийн өмнө МАН-аас хөөгдсөн С.Мөнхчулуун бие даагчийн хувиар Хотын даргын энэ удаагийн өрсөлдөөнд заалнаас дахин нэрээ дэвшүүлнэ гэдгээ албан ёсоор мэдэгдсэн. Түүнийг намын албан ёсны шийдвэрт хүндэтгэлтэй хандах, дүрмийг зөрчихгүй байх, ашиг сонирхлын аливаа явцуу нөлөөнд автахгүй байх, бүх шатны удирдах зөвлөлийн шийдвэрийг зөрчихгүй байх гэсэн заалтуудыг зөрчсөн гэх үндэслэлээр МАН-ын гишүүнчлэлээс хассан гэж МАН-ын Хяналтын ерөнхий хорооны дарга Д.Батбаатар мэдэгдсэн юм.

Харин С.Мөнхчулуун МАН-ыг гишүүдээ ялгаварлан гадуурхсан шударга бус шийдвэр гаргасан гэж мэдэгдсэн.

Түүний хувьд МАН дахь Хотын фракцид /М.Энхболдын тэргүүлдэг/ харъяалагддаг. Тийм ч учраас Ерөнхий сайд У.Хүрэлсүх түүнийг батламжлаагүйн дээр МАН-аас хөөсөн. С.Мөнхчулууныг бие даагч болговол олонхийн дэмжлэгийг авч чадахгүй гэх төлөвлөгөөг Ерөнхий сайд У.Хүрэлсүхийн талынхан боловсруулсан гэх мэдээлэл бий.

Харин Ерөнхий сайдын энэхүү үйлдэл, шийдвэрүүд нь олон нийтэд С.Мөнхчулуун гэх хүнийг таниулахын зэрэгцээ өрөвдүүлж орхив. Ноёны бөх унадаггүйд монголчууд угаас л дургүй дээр нь С.Мөнхчулуун өрөвдүүлэх тактикийг хэрэглэж эхэлсэн нь өнгөрсөн долоо хоногт болсон зарим үйл явдлаас харагдлаа.

Нийслэлчүүд нэг сар гаруйн өмнө С.Мөнхчулууныг таньдаггүй байсан бол одоо энэ хүнийг Хотын дарга болгосон ч яахав гэх хандлага ажиглагдаж эхлэв.

У.ХҮРЭЛСҮХ С.АМАРСАЙХАНД ЭРГЭЛЗЭЖ ЭХЛЭВ

Нөгөө талд МАН-ын Удирдах зөвлөлөөс энэ удаагийн Хотын даргын өрсөлдөөнд хэнийг нэр дэвшүүлэхээ сайтар ярилцаж байна. Эх сурвалжийн мэдээлж буйгаар даваа гаригт МАН-ын Удирдах зөвлөл хуралдаж Хотын даргад нэр дэвшигчийн асуудлыг ярина гэх. Уг хуралдаанд Ерөнхий сайд У.Хүрэлсүх нэг хүний нэрийг санал болгож бусад нь дэмжих эсэхээр санал хураах юм.

Хотын даргын өрсөлдөөнд өмнө нь нэрээ дэвшүүлж ялагдсан НИТХ-ын дарга С.Амарсайханыг өрсөлдөнө гэх мэдээлэл байгаа. Өөрөө ч амбиц ихтэй, хөөцөлдөлгөө сайтай байгаа гэх.

Гэхдээ Ерөнхий сайд У.Хүрэлсүх С.Амарсайханыгаа ялалт байгуулна гэдэгт бүрэн итгэхгүй байгаа учраас ялагдах эрсдлээс сэрэмжилж түүний оронд нэр дэвших боломжтой өөр хувилбарыг хайж эхэлсэн гэх. Мөн С.Амарсайхан нь Хотын газруудад хууль бусаар эзэн суусан нь Хотын дарга болоход зохимжгүй гэх шүүмжлэл байгаа юм. Ганцхан жишээ хэлэхэд Туул голын эрэгт холбогдох хэд, хэдэн хууль дүрмийг зөрчиж тэрээр обьект барьсан гэгддэг билээ.

МАН-ын удирдлагууд С.Амарсайханыг нэр дэвшүүлэхгүй харин гаднаас намын Ерөнхий нарийн бичгийн дарга Д.Амарбаясгаланг нэр дэвшүүлж магадгүй гэх яриа байгаа юм.

ХЭН НЬ ТАВАН ТӨЛӨӨЛӨГЧИЙН САНАЛЫГ ИЛҮҮ АВЧ ЧАДАХ ВЭ

Ямартай ч хоёр тал саналаа хайрцаглах тал дээр эрчимтэй ажиллаж эхэлжээ. Өмнө нь С.Мөнхчулууныг 24, С.Амарсайханыг 19 төлөөлөгч дэмжсэн. Харин энэ удаа таван төлөөлөгчийн санал дээр аль нэг нь ажиллахад л болох юм. НИТХ нийтдээ 45 төлөөлөгчтэйгээс МАН 34, АН 11 төлөөлөгчтэй билээ.