Төв аймгийн Заамар сумын нутаг дэвсгэрт үйл ажиллагаа явуулдаг “Эко Алтан Заамар” ХХК-ийн уурхайд осол өнгөрсөн сарын 28-ны өдөр гарч хоёр техник, зургаан хүн дарагдсан юм. Хоёр хүнийг нурангиас гарган эмнэлэгт хүргэсэн бол Онцгой байдлын ерөнхий газрын алба хаагчид үлдсэн дөрвөн хүнийг эрэн хайх ажиллагааг үргэлжлүүлж байна.

Уурхайн ослын улмаас дарагдсан дөрвөн хүний тухайд Баянхонгор, Булган, Улаанбаатар хотын харьяалалтай, 31-55 насны ажилчид бөгөөд ажилчдын ар гэрийнхэн нь ослын газарт ирсэн байна. Урьдчилсан дүгнэлтээр 80 орчим метрийн өндөр хана нурсан, талбайн хэмжээг 5400м2 гэж үзжээ.

Хөрсний нуралт болсон уурхайд аврах багийг ахлан ажиллаж буй ОБЕГ-ын дэд дарга, хурандаа Б.Ууганбаяр ослын талаар “Осол гарсан өдөр уурхайн талбайд ажиллаж байгаад дарагдсан дөрвөн хүний хоёр нь эксковатор болон бульдозертойгоо шороонд дарагдсан бол насос дээр ажиллаж байсан хоёр хүн нурангиас зугтаж байгаад дарагдсан байна. Ажилчид хаана байж болзошгүй вэ гэдгийг тогтоочихсон. Гэсэн ч усны түвшин өндөр, нэмж хана даган ус урсч байгаа, дахин нуралт үүсэх эрсдэлтэй байна" гэсэн юм.