Гуравдугаар сарын 10-ны өдөр Баянзүрх дүүргийн цагдаагийн хоёрдугаар хэлтсийн алба хаагчид хараа хяналтгүй ганцаараа явж байсан нэг настай эрэгтэй хүүхдийг тус дүүргийн 21-р хорооны нутаг дэвсгэрээс 16.00 цагийн орчимд олсон байна.

Гудамжинд ганцаар явж байсан хүү хэлд ороогүй учраас өөрийн болон аав ээжийнхээ нэрийг хэлж чадахгүй байсан аж. Иймд Нийслэлийн бусад цагдаагийн хэлтсүүдэд зарлан мэдээлэл хүргэсэн байна. Цагдаагийн алба хаагчид асарч, орой болтол эцэг эхийн үүргийг орлон гүйцэтгэсэн. Тэд хүүгийн эцэг эхийг олж тогтоохын тулд бүхий л арга хэмжээг авсан боловч ар гэрийнхэн нь олдоогүй учраас хүүг тухайн өдрийн 23:30 цагт "Хүүхдийн тусламжийн 108 төв"-д хүлээлгэн өгчээ.

Гэтэл хүүгийн эцэг эх хүүхдээ алга болсныг өчигдөр буюу гуравдугаар сарын 10-ны орой мэдэж улмаар 20:16 цагт цагдаагийн байгууллагад хандсан байна. Хүү алга болсон ч эцэг эх нь эрэн хайхгүй байсан шалтгааныг тодруулахад, хүүгийн эцэг эх салсан бөгөөд хүү аавтайгаа байдаг аж. Хүүгийн аав нь тухайн өдөр "Ээж нь аваад явсан биз" хэмээн тоогоогүй орхисон байжээ.