-ӨМНӨХ УДИРДЛАГА ЭРГЭЖ ТОМИЛОГДОХ УУ-

Урьдчилсан хорих 461-р ангид 48 цаг саатуулагдаж байсан гавъяат хуульч амь насаа алдсанаар ШШГЕГ-ын дарга Ц.Амгаланбаярыг халагдана гэсэн бор шувуу нисэж эхэлсэн. Харин бригадын генерал Ц.Амгаланбаяр энэ сарын 20-ны өдөр ажлаасаа өөрийн хүсэлтээр чөлөөлөгдөх өргөдлөө гаргасан байдаг. Улмаар тэрээр энэ сарын 22-ны өдөр үүрэгт ажлаа албан ёсоор хүлээлгэн өгчээ. Харин түүнийг албан ёсоор үүрэгт ажлаа хүлээлгэн өгсөн даруй дараагийн даргад хэнийг ирэх талаар таамаг өрнөж эхлээд байна.

ШШГЕГ-ын даргыг Засгийн газрын хуралдаанаар нэрийг нь оруулж томилдог бөгөөд дараагийн даргад одоогийн ЦЕГ-ийн дэд дарга бөгөөд Нийслэлийн цагдаагийн газрын даргаар ажиллаж байгаа Д.Ядамдорж яригдаж байгаа ажээ. Мөн Цагдаагийн ерөнхий газрын дэд дарга, цагдаагийн хурандаа З.Дашдаваа ч яригдаж байгаа аж.

ШШГЕГ-ын даргаар томилогдон очих магадлал өндөр байгаа Д.Ядамдорж нь 2012-2014 онд Шүүхийн шийдвэр гүйцэтгэх ерөнхий газрын дарга, даргын зөвлөхөөр, 2014 оноос Хууль сахиулахын их сургуулийн Албаны зохион байгуулалт, санхүү хангамж эрхэлсэн дэд захиралаар тус тус ажиллаж байжээ. Харин одоо Цагдаагийн ерөнхий газрын Дэд бөгөөд Нийслэлийн Цагдаагийн газрын даргаар ажиллаж байгаа юм байна.

-ШШГЕГ-ЫН НЭР БҮХИЙ УДИРДЛАГА АЛБАН ХААГЧДААСАА САР БҮР СУУТГАН АВДАГ БАЙСАН УУ-

ШШГЕГ-ын өмнөх нэр бүхий зарим удирдлагыг тойрсон асуудал гардаг. Тэрний нэг нь сүүлийн хэдхэн жилийн хугацаанд бүх бие бүрэлдэхүүн, алба хаагчдаасаа сар бүр татаас гэж хэлж болох суутган авдаг байсан тухай яриа гарах болжээ. Тус газар нийтдээ 3000 гаруй алба хаагчтай бөгөөд бүх ажилчдынхаа сар бүрийн цалингаас 30-50 мянган төгрөгийн суутгал авдаг байж. Энэхүү суутгал авдаг байдлаа өмнөх удирдлага дүрэмт хувцасны мөнгө хэмээн тайлбарлаж буй юм.

Төрийн онцгой чиг үүрэг гүйцэтгэж, байнгын хүнд нөхцөлд алба хаадаг энгийн алба хаагчид дүрэмт хувцасны мөнгө гэх суутган, татаасыг сүүлийн хэдэн жил төлж буйгаа эсэргүүцсээр өдийг хүрчээ. Шоронд ял эдэлж буй ялтангууд сар бүр ар гэрээсээ мөнгө авч, олон жил ял эдэлсэн хоригдлуудад өгдөг хэмээн иргэд ам дамжин ярьсаар ирсэн. Гэтэл шоронгийн энэ систем Засгийн газрын хэрэгжүүлэгч агентлагын удирдлагын төвшинд хүртэл байсан байх магадлалтай байгаа аж. Сар бүр ийнхүү татаас авдаг асуудал нь алба хаагчдын эрх ашиг зөрчигдөж байгаа тул дараагийн томилогдон очих дарга энэхүү алдааг гаргахгүй байх хэмээн алба хаагчид нь найдаж суугаа юм байна.