-ОХИНЫ МИНЬ ЗҮРХ НИЙТ ГУЧИН МИНУТ ЗОГССОН ГЭЖ БАЙЦААГЧ ХЭЛСЭН-

Хан-Уул дүүргийн 15-р хорооны нутаг дэвсгэрт байрлах “Тод Каннам” гэх эрэгтэйчүүдийн мэс заслын эмнэлэгт гуравдугаар сарын 26-ны өдөр гоо сайхны өөх соруулах хагалгаанд орсон 29 настай эмэгтэйн зүрх нь ачааллаа дийлээгүйн улмаас амь насаа алдсан харамсалтай хэрэг гарсан талаар бид өмнө мэдээлсэн.

Дээрх мэдээллийн дагуу талийгаачийн аав Б.Гүндсамбуутай ярилцсанаа уншигч таньд хүргэж байна.

-Таньд гүн эмгэнэл илэрхийлье. Охин тань хагалгаанд орж байхдаа харамсалтайгаар амиа алдсан гэлээ. Таньд энэ талаар ямар мэдээлэл байна вэ?

-Миний охин мэс засалд орсон юм байна. Тэр өдрөө гэнэт хүндрэл өгч зүрх нь зогссон. Тэгээд төв Нэгдүгээр эмнэлэгт хүргэгдсэн байгаа юм. Тэндээ нийтдээ тав хоноод дөрөвдүгээр сарын 1-ний өдөр бурхан боллоо.

-Танай гэр бүлийнхэнтэй “Тод Каннам” эмнэлгийн зүгээс ямар нэг тайлбар хэлж, холбоо барьсан уу?

-Охиныг маань нас барахаас өмнө эмнэлэг дээр нэг л удаа ирсэн. Түүнээс хойш тэр эмнэлгээс нэг ч хүн холбогдоогүй. Хүргэн рүү маань “Уучлаарай” гэж мессеж бичсэн байна лээ.

-Хагалгааг хэдэн төгрөг төлж хийлгэсэн юм бэ?

-Өөх соруулах хагалгааг гурван сая таван зуун мянган төгрөг төлж хийлгэсэн байна лээ. Манай хүргэн охин хоёр мөнгийг нь бүтэн төлөөд хагалгаандаа орсон. Ямар ч асуудал эрсдэл гарахгүй гэж хэлээд оруулсан байгаа юм.

-Мэргэжлийн бус эмч тус хагалгааг хийсэн гэсэн. Энэ үнэн үү?

-Тэр хувийн эмнэлэг нь мэргэжлийн бус эмч нартай, хагалгаа хийх зөвшөөрөлгүй байсан гээд телевизийн мэдээгээр гараад байна лээ. Хагалгаа хийдэг өдөр нь 04 цагт би Орхон аймгаас ирсэн.

-Нэгдүгээр эмнэлгийн эмч нар ямар онош хэлж байв?

-Нэгдүгээр эмнэлгийн эмч нарт ах нь үнэхээр гомдохгүй. Надад эхлээд хэлэхдээ долоон минут зүрх нь зогссон гэсэн. Гэтэл ирээд сайн асуутал 15 минут зүрх нь зогссон гээд байсан. Харин өнөөдөр байцаагч дээрээ очиж уулзахад нийтдээ гучин минут зогссон байгаа юм даа

Нэгдүгээр эмнэлгийн мундаг сэтгэлтэй эмч нар хийх ёстой юм аа хангалттай хийсэн. Хийж болох бүх арга хэмжээгээ авсан. Тэр харин миний ганц охиныг алсан алуурчдад л ах нь их гомдож байна. Хуульгүй байсан бол очоод алчихмаар санагдаад сууж чадахгүй байна. Ах нь ганцхан охинтой хүн. Гэтэл ганц охин минь өөд болчихлоо. Талийгаач охин минь өөрөө бас ганц таван настай охинтой. Гэтэл одоо ах нь зээгээ тэврээд л хоцорлоо маш их харамсаж байна. Бид нар дөнгөж сая буяныхаа ажлыг хийж дуусгаад буцаад Орхон аймаг руу явж байна.

-ЭМНЭЛГИЙН ЗҮГЭЭС БӨӨ АВЧИРААД НЭГ ЗАН ҮЙЛ ХИЙГЭЭД БАЙСАН-

-Хагалгаа хийсэн эмч нар ийм ноцтой хэрэг гарсан байтал ирж уулзахгүй байна гэж үү?

-Тэр хагалгаа хийсэн эмч болон эмнэлэг маш их “ноотой” юм шиг байгаа юм. Үнэндээ хагалгаа хийх зөвшөөрөлгүй юм билээ. Гэтэл тийм том хагалгааг хийгээд хүн алчихлаа. Тэр эмнэлэг эрэгтэй хүнийг эмчилдэг гэсэн хирнээ эмэгтэйчүүдэд гоо сайхны хагалгаа хийгээд байдаг. Эмнэлэг дээр охиныг маань ухаангүй байхад хэдхэн ширхэг тариа барьж ирээд уулзсан. Бас эмнэлгийн өрөөнд бөө авчирч охинд маань нэг зан үйл хийлгэсэн шүү. Би үнэндээ нэмэр болох байх гэж найдаад эмч нараас гуйж байгаад бөөг нь оруулсан юм. Миний охин эцэг эх, үр хүүхдээ тэжээгээд явдаг байсан хүүхэд шүү дээ.

-Та хамгийн сүүлд охинтойгоо хэзээ уулзаж байсан бэ?

-Сүүлд охин маань Эрээн хот руу явахдаа “Ааваа сайн сууж байгаарай” гээд үнсүүлээд гарсан. Их хатуу хорвоо юм. Миний муу зээ охин таван настай өнчин хоцорлоо. Ах нь бол үнэхээр их гомдолтой байна.

-Бидэнд бодит мэдээлэл өгч, ярилцахыг зөвшөөрсөн таньд баярлалаа.

-За баярлалаа. Хэрэг үнэн зөвөөр шийдэгдээсэй л гэж хүсч байна.

ГЭРЭЛ ЗУРГИЙГ Г.БАЗАРРАГЧАА