"Эрдэнэт" үйлдвэрийн захирал Х.Бадамсүрэнгээс цаг, үеийн асуудлаар зарим зүйлийг тодрууллаа.

-“Ocean Partners" компани Ш.Батхүүг “Эрдэнэт” үйлдвэрийн 51 хувийг барьцаалан зээл авахад зуучлагчаар ажиллаж тусалсан. Гэтэл энэ компани сая дахин зуучлагчаар ажиллажээ. Энэ ямар учиртай юм бэ?

- Үүсээд буй эрсдлийг тооцоолж зохих журмынх нь дагуу ажилласан. Бид гадаад өрийг хаах үүднээс ажилласан. Илүү мэдээлэлгүй байна.

- Өмнө нь асуудал үүсгэсэн компанийг дахин зуучлагчаар ажиллуулсан учир шалтгаан нь юу юм бэ?

- Асуудалтай байсныг нь би мэдэхгүй юм. Асуудалтай байсан гэж хэлсэн хүмүүсээсээ асуу.

-Зуучлагчаар ажилласны хөлсөнд тус компанид хэдэн төгрөг төлж байгаа юм бэ?

-Нэг ч төгрөг, доллар төлөөгүй.

- Тэгэхээр Зэсийн баяжмалаар төлбөрийг нь төлж байгаа юм уу?

- Бид сая 40 сая долларын өрийг төлсөн. Дүрэм, журмынхаа дагуу явж буй ажил. Үйл явц удаан байна. Миний хувьд том эрх ашгаа бодож ажиллах ёстой. Зохих журмынх нь дагуу ажиллах ёстой. Аливаа гэрээ, хэлцэл цаг хугацаатай. Хэлцэл хийж буй талууд бие, биенийхээ өмнө хүлээсэн үүрэгтэй. Гадаад харилцаа, өр төлбөртэй холбоотой асуудлуудыг нэг цонхоор зөв явуулж байж бид хожно.

- Ш.Батхүүгийн тавьсан өрийг Эрдэнэт үйлдвэрийн “Эрсдэлийн сан”-аас төлсөн юм уу. Нөөц хөрөнгөөс төлсөн үү?

-“Эрсдэлийн сан”-гаас төлсөн. Засгийн газрын ажлын хэсэгт албан журмынх нь дагуу энэ талаар мэдээлэл бэлтгэж өгнө.

- 40 сая долларыг буруутай этгээдүүдээр гаргуулахын тулд "Эрдэнэт" үйлдвэрээс хууль, хяналтын байгууллагад хандсан уу?

- Би тушаал гаргаж ажлын хэсэг байгуулсан. Ажлын хэсэг төлөвлөгөө гаргаад хохирлыг буруутай этгээдүүдээр төлүүлэхээр ажиллаж байгаа. Энэ бол зарчим юм.

- Буруутай эсэх нь шүүхийн шийдвэр гарсны дараа л тодорхой болно. Түүний дараа буруутай этгээдүүдээр хохирол нөхөн төлүүлнэ гэсэн үг үү?

- Хууль хяналтын байгууллагын шийдвэр гарсны дараа энэ асуудал шийдэгдэнэ. Тэр хүмүүсийн хөрөнгө, мөнгөтэй эсэхийг хууль хяналтын байгууллагаас тогтооно.

-"Эрдэнэт" үйлдвэр дэх "Эрсдлийн сан"-ийн зарцуулалтын дотоод журмын талаар танилцуулна уу. Хууль бусаар гарсан мөнгийг "Эрсдэлийн сан"-гаас төлж буй нь ямар учиртай юм бэ?

-Бүх зүйл хууль журмынхаа дагуу явагдаж байна. Илүү дэлгэрэнгүй мэдээлэл өгөх боломжгүй байна.

-Саяхан "Эрдэнэт" үйлдвэрт нэлээн хэдэн томилгоо хийгдсэн. Уг томилгоонд улс төрийн нөлөөлөл орсон гэх шүүмжлэл байна?

-"Эрдэнэт" үйлдвэрийн томилгоонд ямар нэгэн улс төрийн нөлөөлөл ороогүй. Засгийн газар энэ удаагийн томилгоонд оролцоогүй.

- Дахин томилгоо хийгдэх үү?

- Мэргэжлийн болоод үйлдвэрийн түвшинд хийгдэж байна.