Кино урлагийн дээд шагнал гардуулах “Cinema Awards-2019” наадмын ёслол өчигдөр болж өндөрлөлөө. Наадмын хүндтэй зочдын нэг яах аргагүй Холливудын алдарт жүжигчин Руди Янгблад байв. Түүнийг дэлхий дахинд алдаршсан “Apocalypto” киногоор нь монголчууд сайн мэднэ. Тэрбээр ёслолын үйл ажиллагааг нээж бишгүүр хөгжим тоглосон нь зочдод барьсан гэнэтийн бэлэг байв.

-Сайн байна уу. Монгол Улсад ирсэн анхны сэтгэгдэлээсээ хуваалцахгүй юу?

-Сайн байна уу, танай сайтын уншигчдад энэ өдрийн мэндийг хүргэе. Монгол орон маш сайхан өргөн уудам газар нутагтай, элэгсэг дотно, нөхөрсөг сайхан ард түмэн байна. Монгол орон надад маш их таалагдлаа.

-Та монголд ирэхээсээ өмнө манай улсын тухай хэр их судалсан бэ?

-Би америк тивийн уугуул индианчуудын үр сад. Монголчуудын амьдралын хэв маяг америкийн индианчуудтай их төстэй. Холын хамаатнууд ч байж магадгүй юм. Тиймээс би монголчуудын талаар өөрийнхөө хэмжээнд судалж тодорхой хэмжээний мэдлэгтэй болсон.

-Монголчууд таныг “Apocalypto” киногоор нь маш сайн мэднэ. Хэдэн настайдаа энэ бүтээлд тоглож байв?

-Маш их баярлалаа, Би “Apocalypto” кинонд тоглохдоо 25 настай байсан. Одоо хэдэн настайгаа нууцалмаар байна.

-Америкийн уугуул иргэд индиан омгуудыг устаж үгүй болох аюул нүүрлэсэн гэж сонсч байсан. Индианчууд орчин цагт хэрхэн амьдарч байна вэ?

-Би АНУ-ын индианчуудын “Команчи” овгийн хүн л дээ. Орчин цагт индианчууд АНУ-ын Засгийн газраас тогтоосон байгалийн тусгай хамгаалалттай газар амьдардаг. Зарим нь орчин үеийн хэв маягаар амьдарч байна. Гэхдээ индианчууд гарал угсаа, ёс заншлаа хойч үедээ өвлүүлэн хадгалсаар л байгаа.

-Та гэр бүлтэй юу?

-Би одоохондоо ганц бие амьдардаг.

-Танд монголын уран бүтээлчид хамтарч ажиллах санал тавьбал хүлээж авах уу?

-Холливудын ертөнц монголын киногоор дутаж байна. Яагаад гэхээр монголчууд дундрашгүй баялаг түүхтэй ард түмэн. Улс, гүрнүүд өөрсдийнхөө түүх соёл, амьдралын хэв маягийг харуулсан киногоор дэлхийн зах зээлд өрсөлдөж байна шүү дээ. Хэрэв надад монголын уран бүтээлчид хамтран ажиллах санал тавьбал татгалзах зүйл байхгүй ээ.

ГЭРЭЛ ЗУРГИЙГ Ц.ЭНХТАЙВАН