Орхон аймгийн засаг даргын үйл ажиллагааны хөтөлбөрт туссаны дагуу гэр хорооллын айл өрхийг инженерийн шугам сүлжээнд холбох, камержуулах, мэдээллийн технологиор хангах зорилтын хүрээнд 5000 өрхийг шилэн кабельд холбох ажлыг судалж байгаа аж.

Засаг даргын захирамжаар байгуулсан ажлын хэсэг “Юнивишн” компанийн Орхон аймаг дахь салбарын төлөөлөлтэй уулзаж санал солилцох үед тус компани зэргэлдээ орших 11 багийн 5000 айлыг хамруулсан шилэн кабелийг өөрийн хөрөнгөөр татах тухайгаа мэдээлжээ. Ингэснээр гэр хорооллын иргэд тус компаниас орон сууцны хороололд үзүүлдэг гурвалсан үйлчилгээг авах боломжтой аж. Одоогоор судалгааны ажил хийхээр төлөвлөж байна гэж “Юнивишн” компанийн төлөөлөл хэллээ.

Дээрх компани гэр хороололд шилэн кабель татах 5 тэрбум төгрөгийг өөрсдөө гаргах бөгөөд энэ боломжийг тулгуурлан гэр хороололд 24 цагийн ажиллагаатай дүрсний камер суурилуулах боломжтой ажээ.