“Exclusive” компанийн захирал Г.Майцэцэг өнөөдөр сэтгүүлчдэд мэдээлэл хийлээ. Тэрбээр “Би үйлдвэрлэгч хүний хувьд наадам дөхөөд ажил ихтэй байсан хэдий ч зайлшгүй ярих шаардлагатай болоод ярихаар ганцаараа хүрээд ирлээ. Намайг ЖДҮ-гийн төсөлд хамрагдсан уу гэж хүмүүс асуудаг. Би төсөлд хамрагдахын тулд дуугараагүй шүү гэж хэлэх гэсэн юм. ЖДҮ бол жижиг биш том асуудал. Төсөл бичсэн хүн бүрийн төсөл хэрэгждэг байгаасай гэж хүссэн. Өнөөдөр төрд аль нэг нам эвсэл хэн байхаас үл хамаарч ажлын байр нэмэгдүүлэх хамгийн том салбар бол яах аргагүй ЖДҮ, бизнес эрхлэгчид. Тиймээс төсөл бүрийг амжилттай хэрэгжээсэй гэж дуугарч байсан. Энэ жил хот болон орон нутгаас жижиг дунд үйлдвэрлэгчид нийт 487 тэрбум төгрөгийн төсөл бичиж, дэмжлэг авахыг хүсчээ. Өнөөдрийг хүртэл энэ 487 тэрбумыг яаж төсөвт суулгах вэ гэж ярьж, яавал энэ хүмүүсийг дэмжих вэ гэж ярихын оронд төрийн томчууд нь ямар байдалтай юу яриад төрийн ордонд сууж байгааг Монгол Улс даяараа харж байгаа.

Би өнгөрсөн хоёрдугаар сарын 28-нд Монгол Улсын Ерөнхийлөгчид иргэншлээсээ татгалзах тухай бичиг хүргүүлж байсан. Гуравдугаар сарын 26-нд Ерөнхийлөгчийн Тамгын газраас хариу ирсэн. Тодруулбал Монгол Улсын Их хурлын Ес зүйн хороонд “Иргэн Г.Майцэцэгийн гаргасан өргөдөлийг зохих журмын дагуу судлан үзэж хариу өгнө үү” гэсэн албан тоот явуулсан. Энэ өдрөөс хойш гурван сар өнгөрчээ. Төрийн алба иргэддээ 14-30 хоногийн дотор мэдээлэл хариу өгөх үүрэгтэй. Гэтэл надад ямар ч хариу өгсөнгүй. Хэн ч залгаж ярьсангүй.” гэв.