Допингтой холбоотой асуудлаар барилдах эрхийг нь хоёр жилийн хугацаатай түдгэлзүүлээд байсан Улсын гарьд Ө.Бат-Орших, Улсын заан Б.Пүрэвсайхан, Улсын начин Э.Даш, Аймгийн хурц арслан Б.Номиндалай, Сумын заан С.Майнбаяр нарыг баярлуулан гомдоосон үйл явдал болоод байна. Тэдний барилдах эрх 2020 оны хоёрдугаар сарын нэгнээс хууль ёсоор сэргэх ёстой байсан ч дээрх бөхчүүд баяр наадам дөхөж байгаа энэ үед өөрсдийнхөө буруутай үйлдлийг хүлээн зөвшөөрч МҮБХ-ны тэргүүн Б.Бат-Эрдэнэд өргөдөл гаргаж, дахин ийм алдаа гаргалгүй, монгол бөхийн нэр төрийг эрхэмлэж явахаа амлаж, барилдах эрхийг нь сэргээж өгөхийг хүссэн юм. Улмаар МҮБХ-ны тэргүүлэгчид дээрх бөхчүүдийн өргөдлийг хүлээн авч хэлэлцээд шийтгэлийн хугацаанаас 70 гаруй хувийг эдэлснийг харгалзаж үзэн санал хурааж, олонхийн саналаар тэдний барилдах эрхийг сэргээхээр шийдвэрлэсэн гэдгээ олон нийтэд зарласан юм.

Гэтэл өнгөрсөн амралтын өдөр болсон наадмын сорилго барилдааны үеэр “допингтой” бөхчүүдтэй барилдахгүй хэмээн улсын аварга Ч.Санжаадамба тэргүүтэй бөхчүүд эсэргүүцлийн “суулт” зарласнаар сорилго барилдаан эхлэхгүй нэлээд удаан үзэгчдийг чилээв. Эрхийг нь сэргээлээ хэмээн баярлаж наадмын бэлтгэлдээ гарчихсан байсан дээрх бөхчүүдийн хувьд энэ явдал хүнд цохилт болсон гэж хэлж болно. Бөхчүүд болон үзэгчдийн эсэргүүцэлтэй тулгарсан Б.Пүрэвсайхан тэргүүтэй бөхчүүд аргагүйн эрхэнд мэхийн ёсолж үзэгчдээ хүндэтгээд гарч одов.

Өрөвдмөөр ч юм шиг. Яг үнэндээ эдгээр бөхчүүд Монголын үндэсний бөхийн холбоо гээч шийдвэргүй байгууллагын золиос болчихлоо. Үнэхээр хууль дүрмээ биелүүлдэг байгууллага сан бол хуулиараа барилдах эрхийг нь сэргээнэ гээд тас гүрийсэн бол өнөөдөр ийм байдалд орохгүй байлаа. Гэтэл эрхийг нь сэргээж байна гэж улс орон даяар зарлан тунхаглаж, бөхчүүдийн сэтгэл санааг үймүүлж, барилдах гээд ирэхэд нь өөрсдийн гаргасан шийдвэрээрээ өмгөөлж хамгаалж чадахгүй, шийдвэрээ эргэж харъя хэмээн өөрсдийн итгэл үнэмшлээсээ ухрав. Ч.Санжаадамба аваргаар зад загнуулаад л ухарчихаж байгаа юм. Ч.Санжаадамба аварга дэлхий нийтээрээ хүн төрөлхтөн допингийн эсрэг тэмцэж байхад МҮБХ тав зургаан хүний эрх ашгийн төлөө шийдвэр гаргасанд харамсаж байгаагаа илэрхийлсэн. Мөн манай холбоо допингийн асуудал дээр хатуу байр суурьтай байвал цаашдаа олон залуучуудад сургамж болно хэмээсэн. Түүний ч зөв.

МҮБХ итгэл үнэмшлээсээ нэг удаа ухарсан юм биш. Өмнө нь Увс нуур галын 20 жилийн ойн барилдааны үеэр Х.Баянмөнх аваргаар зад загнуулаад л допингтой гээд эрхээ хасуулсан улсын гарьд Ө.Бат-Оршихыг үг дуугүй барилдуулчихсан. Үзэгчид дургүйцлээ илэрхийлээд байгааг ч тоогоогүй. Шийдвэр бол шийдвэр, хассан л бол хассан байх ёстой.

Наадам дөхөж, монгол хүн бүрийн сэтгэл гэгэлзэж, хэний аавын хүү наадмын түрүү авах бол гэж таамаг дэвшүүлэн буй энэ цаг үед МҮБХ наадамчин олон болон өөрсдийгөө хоёр жил шахам “сойсон” таван бөхийг сэтгэл дотор нь уйлуулчихлаа. Одоо ямар шийдвэрт хүрэх гэж байгаа, горьдлого төрүүлчихсэн таван бөхийн асуудлыг хэрхэх гэж байгаа талаар нь мэдээлэл авах гэхэд “Ямар нэг шийдвэрт хүрээгүй байна” гээд хээв нэг хариулахаас татгалзаад сууж байна.

Монголын үндэсний бөхийн холбоо гээч энэ байгууллага “хоёр толгойтой”, хөл толгой нь мэдэгдэхгүй улстөржилт хийсээр удлаа. Эвлэрлээ ч гэнэ, саллаа л гэнэ. Энэ улстөрийн бохир тоглоомдоо бөхчүүдийг оролцуулж, талцуулдаг байдал хэрээс хэтэрлээ. Энэ хоёр холбооны эв санааны нэгдэлгүй, тамга тэмдгийн төлөөх тэмцлээс болж дэлхийн энх тайвны бэлэг тэмдэг болсон тамирчид, спортынхон, бөхчүүд нь хүртэл жагсаал цуглаан зохион байгуулж тэмцэлддэг болов. Монголд жагсаал хийж, суулт зарладаггүй салбар ч гэж байхаа больж байна. Улстөржилт гээч бохир заваан зүйл эцэстээ спортынхныг хүртэл хувааж чаддагийг эндээс харж болж байна.

Одоо ганц л зүйл бөхөө дээдэлдэг монголчуудын санааг зовоож байна. Монгол наадмын өдөр монгол бөхчүүд нь зүлэг ногоон дэвжээнээ суулт зарлаад, дэлхийд шившиг болох юм биш биз дээ гэх айдас. Тиймээс наадам дөхчихсөн энэ чухал үед бөхчүүдийн сэтгэл санааг үймүүлсэн шийдвэрээ хурдан нэг тийш болгож, маргаан будилаангүй, дэлхийд ганцхан монгол наадмаа сэтгэл өөдрөг, баяр цэнгэлээр дүүрэн өнгөрөөх боломжийг бүрдүүлэхийг МҮБХ-ноос хүсье.