Ардчилсан Намын нарийн бичгийн дарга О.Магнай, Д.Оросоо нар Үндсэн хуульд оруулах нэмэлт, өөрчлөлтийн төсөл болон цаг үеийн бусад асуудлаар мэдээлэл хийж байна.

Ардчилсан Намын нарийн бичгийн дарга О.Магнай: Өнгөрсөн хоногуудад хэд хэдэн яамны гадаа сайд нарыг нь огцруулахаар иргэдийн хийсэн жагсаалыг сөрөг хүчний хувьд АН дэмжиж ажилласан гэдгээ илэрхийллээ. Гэхдээ АН-ын зүгээс санхүүжүүлээгүй гэдгийг албан ёсоор мэдэгдэж байна гэв. Тухайлбал, хариуцсан ажилтнууд нь 70 кг хар тамхины хэрэгт холбогдоод байхад салбарын сайд нь ажлаа өгөхгүй байна гэв. Тэрбээр "Д.Цогтбаатарыг уг нь ёс зүйтэй хүн гэж бодож байсан юм. Дипломат ажилчид нь 70 кг байтугай 7 гр хар тамхины хэрэгт холбогдвол хариуцлагаа хүлээгээд огцрох нь зүйн хэрэг. Гэвч тэгсэнгүй. Хэн нэгэнд хариуцлага хүлээлгэхгүй өнгөрөөж байна.

Эрүүл мэндийн сайд Д.Сарангэрэл “Тэмбүүтэй тэмцэнэ” гэсэн мэдэгдлийн дараа Монгол Улсын аялал жуулчлалын компанид захиалга өгсөн жуулчдын 20 хувь нь захиалгаа буцаасан байна. Манай улсад зуны улиралд ойролцоогоор 250 орчим жуулчин ирдэг. Үүнээс 40-50 мянган жуулчин манай улсад хийх аяллаа цуцалсан гэж ойлгож болно. Нэг жуулчин ойролцоогоор 1000 ам.доллар манай улсад үлдээдэг гэж тооцоолоход Эрүүл мэндийн сайд гэх эмэгтэй 40 сая ам.доллар олох боломжийг үгүй хийлээ. Сүрьеэтэй холбоотой асуудлыг улстөржүүлэн замхруулаад алга болгож байна.

Хууль зүйн сайд Ц.Нямдорж гэдэг хүнийг ажлаа хүлээлгэж өгөхийг ард түмэн шаардсан. Эх баригчдын ярьж байгаа шиг жагсаал болгоныг 40 сая төгрөгөөр дэмжих санхүүгийн чадамж АН-д байхгүй гэдгийг хариуцлагатайгаар мэдэгдэж байна. Хууль зүйн дотоод хэргийн сайдын хувьд нийгэмд хийхээр зүйл маш их байгаа. Харамсалтай нь өнгөрсөн нэг жилийн хугацаанд иргэдийн сэтгэлд үлдсэн ажлыг төдийлөн хийсэнгүй. С.Зоригийн хэргийг шударгаар шийднэ хэмээн хүлээж байлаа. Одоо ямар шатандаа гацсан гэдгийг мэдэхгүй байна. Иргэдийн дунд хүлээлт үүссэн асуудлыг өнөөдрийг болтол шийдсэнгүй. Ц.Нямдорж гэх хүнийг гадны тусгай албатай холбоотой гэсэн мэдээлэл байдаг. Үүнийг урьд нь тагнуулын байгууллагад ажиллаж байсан олон хүн баталдаг” гэлээ.

АН-ын хуулийн хэлтсийн дарга Д.Оросоо "Эрх баригчид үндсэн хуульд нэмэлт өөрчлөлт оруулах асуудлыг ярьж эхэлсэн гэдгийг та бүхэн мэдэж байгаа. Эх баригчид 2000 онд дордохын долоон өөрчлөлтийг хийж, үүний үр дагаврыг 19 жил амсаж байна. ЖДҮХС-гийн зээл, 60 тэрбумын схем зэрэг сөрөг үр дагаврыг авчирсан. Одоо эрх баригчид дахин ийм зүйл хийхээр төлөвлөж байна. Эрх баригчид наймаа хийх замаар Үндсэн хуульд оруулах нэмэлт, өөрчлөлтийг хийж байна. Энэ бол үнэхээр аюултай. Эрх баригчид дур зоргоороо Үндсэн хуулийг өөрчилж, үүнийг нь Үндсэн хуулийн цэц хянахгүй болж байна. Үүнийг хийхийн тулд Цэцийн гишүүдийн бүрэн эрхийг есөн жил болгон авилгал хийж байна. Энэ удаагийн үндсэн хуулийн өөрчлөлт 2000 оны дордохын долоон өөрчлөлтөөс долоон дор зүйл болж Монгол Улсын хувь заяагаар тоглох гэж байна. Тиймээс бид энэ асуудлыг дахин, дахин ярьж олон түмнийг энэ асуудалд анхаарлаа хандуулаач ээ хэмээн хүсч байна. Эх баригчид наймаа хийх зарчмаар Үндсэн хуулийн өөрчлөлтийг хийж байна" гэлээ.

Эрүүл мэндийн дэд сайд асан Ж.Амарсанаа: “Эрүүл мэндийн салбарт гарч буй хариуцлагагүй үйлдлүүдтэй холбоотойгоор Эрүүл мэндийн сайд Д.Сарангэрэлийг огцруулахаар жагсч тэмцэж байна. Бид Ерөнхий сайд У.Хүрэлсүхэд удаа дараа танхимын гишүүндээ хариуцлага хүлээлгэх шаардлагыг удаа дараа тавьсан боловч харамсалтай нь бидэнд хариу ирсэнгүй. Эх, хүүхдийн эндэгдэл 2018 онд өсч ерөнхий боловсролын сургуулиудад сүрьеэгийн тархалт дэгдсэн байхад хариуцлага хүлээлгэсэнгүй. Өчигдөр “Өргөө” амаржих газрын даргыг ажлаас нь чөлөөлсөн. Гэвч бид эрүүл мэндийн салбарт хариуцлагын тогтолцоог бий болгооч гэж хүссэн болохоос биш аль нэг даргаар туг тахиад өөрөө асуудлаас холд зугтаж үлдэхийг төлөө бид жагсаагүй гэв.