Өнгөрсөн дөрөвдүгээр сард Булган аймгийн Ингэт сумын нутагт гарсан ой хээрийн түймрийг унтрааж байгаад гүн түлэгдэж, хөдөлмөрийн чадвараа алдсан Орхон аймгийн Онцгой байдлын газрын аврагч, гал сөнөөгч Э.Үнэнбатын эхнэр А.Мөнгөнцэцэгтэй ярилцлаа.

- Сайн явж ирэв үү. Таны нөхөр Э.Үнэнбат хэзээнээс Онцгой байдлын албанд үүрэг гүйцэтгэсэн бэ?

- Манай нөхөр анх 18 настайгаасаа буюу 1998 оноос хойш онцгой байдлын албанд ажил үүргээ нэр төртэй, хариуцлагатай хашсаар ирсэн. Одоо бид дөрвөн сайхан хүүхдийн эцэг, эх болоод өнөр өтгөн амьдарч байна.

- Осол гарсан талаар хэзээ нь мэдсэн бэ. Одоо биеийн байдал нь хэр байна?

- Тухайн өдөр цаг орой болсон үед онцгой байдлын эмч над руу холбогдож Э.Үнэнбатыг түлэгдсэн талаар хэлсэн. Бид анхны тусламжаа үзүүлсэн. Эмнэлэгт хэвтэх шаардлагатай байна, Эмнэлэг хэвтэх бэлтгэлийг нь базаагаад хүрээд ир гэхэд нь очиход нилээн түлэгдсэн, шокын байдалтай бие нь муу байсан. Ийнхүү Орхон аймгийнхаа эмнэлэгт нэг хоноод дараа нь ГСҮТийг бараадсан. Орхон эмнэлгийн эмч нар долоо хоноод хоёр гарыг нь тайрна гэхэд нь ямартай ч хот руу явж арга хэмжээ авъя гэж шийдээд ирсэн. Арьс нөхөх хагалгаанд ороод биеийн байдал нь арай дээрдсэн. Гэхдээ биеийнх нь зарим хэсэгт арьс хүрээгүй. Зургадугаар сар хүртэл эмчилгээнд явсан ч хоёр гар нь хатингаршсан байдалтай л байна. Манай Улсад эмнэлгийн асуудал хүнд гэдгийг энэ удаа сайн мэдэрлээ. Эрүүл мэндийн салбар хөгжсөн олон оронд хандсан л даа. АНУ, Япон зэрэг улсууд өртөг өндөртэй. БНХАУын эмч нар анхнаасаа манайд эмчилгээнд орсон бол боломж байсан, Одоо ямар ч боломжгүй гэсэн хариу өгсөн. Тиймээс БНСУ-ын зургаан эмнэлэгт хандахад гурав нь ”Ийм хүнд гэмтэл хүлээж авахгүй” гэсэн хариу өгсөн. Харин нэг эмнэлэг нь нааштай хариу өгч долдугаар сарын 30нд ирээд наймдугаар сарын 5нд авч явахаар болсон ч санхүүгийн асуудал шийдэгдэхгүй байсан учир манай улсад ирэх БНСУ-ын эмч нарт үзүүлэхээр болоод байна. Мөнгө санхүү нь ч татуу байж магадгүй гэж найдаад л байна. Нэг хоногийн өмнө ч болтугай эмчилгээнд явах шаардлагтай байгаа. Учир нь цаг хугацаа алдах тусам эмчилгээний үр дүн багасна. Тиймээс хугацаа алдалгүй эмчлүүлж эрүүл саруул болохыг хүсч байна даа. Хань минь тангараг өргөж олон жил улс эх орон, хүн ардынхаа төлөө ажиллачихаад эрүүл мэндийн хурц асуудалтай, тахир дутуу болохыг хүсээгүй. Ямартай ч хоёр гарыг нь яаралтай эмчлүүлэхээр боломжтой бүх л аргыг хайж байна.

- Уучлаарай. Мэдээж хүний эрүүл мэндийг мөнгөтэй харьцуулашгүй. Засгийн газраас Э.Үнэнбатын эмчилгээнд 100 сая төгрөг олгохоор болсон. Та бүгдтэй холбогдож энэ талаар дуулгасан уу?

- Тийм ээ. Эмчилгээний зардалд 100 сая төгрөг олгох шийдвэр гарсан гэж сонссон. Гэхдээ хэзээ, ямар байдлаар олгох нь одоогоор тодорхойгүй л байна. Ерөнхий сайд У.Хүрэлсүхийн туслах нь надтай холбогдож шийдвэр гарсан талаар дуулгасан. Өнөөдөр шийдвэр гараад маргааш олгодог асуудал биш шүү гэж тайлбарласан л даа. Мэдээж Засгийн газраас олгох мөнгө нөхрийн маань хоёр гарыг эмчилхэд тус дөхөм болох нь гарцаагүй. Энэ дашрамд МУын Засгийн газар, “Босоо хөх Монгол”-ын тэргүүн н.Хуягаа ах, АНУ-д ажиллаж, амьдарч байгаа н.Алимаа эгчдээ болон тусалж дэмжсэн бүх хүмүүст монголынхаа сайхан сэтгэлт ард түмэн, хэвлэл мэдээллийнхдээ баярлаж, талархаснаа илэрхийлье. Хэвлэл мэдээлэл гэдэг зовж зүдэрсэн хүмүүст туслахад үнэхээр дэм болдог юм байна. Маш их баярлалаа. Онцгой байдлын алба хаагчдын эрүүл мэнд, амь насанд нь холбоотой хуульд өөрчлөлт орж байвал өөр хүсэх зүйл алга.

- Онцгой байдлын алба хаагчийн гэр бүл байна гэдэг амаргүй. Үүргээ гүйцэтгээд явж байхад нь сэтгэл зовних тохиолдол цөөнгүй байх?

- Тэгэлгүй яахав. Гэхдээ миний хань бид хоёр 19 жил энэ салбарт ажиллахад 17 жилд нь жаргал, зовлонгоо хуваалцаж амьдарлаа. Харьцангуй гайгүй дасан зохьцдог бололтой. Тангараг өргөж, үүргээ гүйцэтгэдэг тэд маань цаг наргүй, хүнд нөхцөлд ажилладаг. Золиос нь миний нөхөр байлаа гэж бодоход цаашид онцгой байдлын алба хаагчдыг бүх талаас нь дэмжээсэй хэмээн хүсэж байна.