Угаарын хийнд хордсон хэд хэдэн дуудлага энэ сарын 04-ны орой Хордлогын яаралтай тусламжийн төвд ирж, 16 иргэн эмнэлгийн тусламж үйлчилгээ авсан боловч харамсалтай нь дөрвөн иргэн амь насаа алдсан. Мөн өчигдөр Сүхбаатар дүүрэгт 28 настай эмэгтэй угаарын хийд хордож амь насаа алдаад байгаа.

Угаарын хийд хордож амь насаа алдсан хоёр хүүхдийн хамаатан болох Б.Батсүхтэй ярилцлаа. Тэрээр үнэхээр харамсалтай зүйл болсон. Иймээс иргэдэд сэрэмжлүүлэх үүднээс ярилцлага өгч байна гэлээ.

-Угаарын хийнээс болж бага насны хоёр хүүхэд амь насаа алдсан харамсалтай зүйл болсон. Юу болсон талаар дэлгэрэнгүй мэдээлэл өгөхгүй юу?

-Энэ сарын 3-4-нд шилжих шөнө манай дүү орой унтахдаа сайжруулсан шахмал түлшээр гэрээ галлачихаад унтсан байсан. Шөнө бага хүүхэд нь уйлаад байхаар сэрээд аавыгаа дуудсан байна лээ. Тэгээд аав ээж хоёр хамт очиход манай дүү хоёр хүүхэдтэйгээ ухаан алдчихсан байсан. Аав нь эргэж гараад түргэн тусламж дуудаад түргэнээ тосоод ирэх хороонд дөнгөж очсон ээж бас ухаан алдчихсан. Түргэний эмч нар ирээд үзээд угаартсан байна гэдгийг хэлсэн. Харин хоёр хүүхэд ямар ч найдваргүй болсон байна гэдгийг эмч нар хэлсэн. Иймээс хоёр том хүнээ аврах арга хэмжээ авна гээд анхны тусламжаа үзүүлсэн. Тухай үед ухаан алдсан хүний зүрх нь зогсох шахаад хиймэл амьсгаа хийж, эмнэлэгт хүргэсэн.

-Хоёр хүүхэд анхны тусламж авч чадаагүй юу?

-Бага хүүхэд түргэн ирэхэд амьсгалтай байсан боловч анхны тусламж авч чадаагүй. Харин хоёр том хүн маань ухаан орохгүй болохоор нэмж түргэн тусламж дуудсан. Ингээд хоёр эмч жолооч нар нийлж байж арай гэж амьсгаатай болгож эмнэлэгт хүргэсэн. Хоёр жаахан амьтан анхны тусламж авч чадаагүйд үнэхээр их харамсаж байна.

-Танай дүүгийнх сайжруулсан шахмал түлшийг өмнө нь эрэглэж байсан болов уу?

-Бараг анх удаа хэрэглэсэн байх. Өмнө нь дандаа модоор галлаж байсан. Өнгөрсөн долоо хоногийн хүйтнээр сайжруулсан түлш аваад анх удаа хэрэглэхдээ ийм зүйл боллоо.

-Одоо танай дүүгийн биеийн байдал ямар байна вэ?

-Дүүгийн биеийн байдал сайжирсан. Хүүхдүүдээ бурхан болсныг мэдээгүй байсан. Өчигдөр дуулгасан. Сэтгэл санаагаар унаж, бие нь гэнэт муудсан. Сэтгэл зүйч болон эмч нар тайвшрах эм тариа хийж байж гайгүй болсон. Маргааш хоёр хүүхдийн ажил явдал болно. Иймээс хүүхдийнхээ ажил явдалд оролцоно гэдгээ эмнэлэгтээ хэлээд түр гарч байгаа. Эмч нар түр гарахыг зөвшөөрсөн.

ИРГЭДИЙГ БУРУУТГАЖ БАЙГААД ҮНЭХЭЭР ХАРАМСАЖ БАЙНА

-Хэрэглэсэн түлш болон худалдаалагдаж байгаа түлшнээс лабораторийн шинжилгээ хийсэн. Шинжилгээний хариу өчигдөр гарсан байсан. Та нарт шинжилгээний хариуг өгсөн үү?

- Түлшнээс дээж шинжилгээ аваад шалгаж байгаа гэсэн. Шинжилгээний хариу буруу хэрэглээ болон галлагаанаас болсон гэсэн дүгнэлт гарсан гэдгийг хэвлэл мэдээллийн хэрэгслээр сонслоо. Харин бидэнд албан ёсны хариу хэлээгүй байна. Би лабораторийн шинжилгээний хариуг нэг иймэрхүү гарна гэдгийг төсөөлж байсан. Төр засаг өөрсдийнхөө хийсэн зүйлийг буруу байсан гэж хэлэхгүй шүү дээ. Өөрсдийгөө өмөөрч иргэдийг буруутгаж байна. Гэхдээ энэ түлшнийхээ асуудал дээр сайн анхаарах хэрэгтэй. Одоо хотын гэр хорооллын бүх айлууд хэрэглээд ирэхийн бол нийслэлийн бүх иргэдийн эрүүл мэндээр хохирч амь насаа алдах байдалд хүрэхвий. Үүнээс урьдчилан сэргийлэх хэрэгтэй. Энэ түлш утаа угаар гарч байгаа нь нүдэнд харагдахгүй хэрнээ хүний бие маш их хор хөнөөлтэй гэдэг нь энэ хордлогоор бараг батлагдлаа. Түүхий нүүрс бол утаа үнэр танар гардаг учраас хүмүүс угаартахаас урьдчилан сэргийлэх боломжтой. Гэтэл энэ сайжруулсан түлш утаа үнэргүй хирнээ хүнийг шууд хордуулж амь насыг хохироож байна гэдэг бол маш аюултай. Нийслэлийн иргэдийн хувьд энэ түлшнээс өөр хэрэглэх зүйл байхгүй байгаа. Иймээс түлшний хэрэглээний асуудалд маш сайн анхаарах хэрэгтэй. Монголын нэг эрдэмтэн нүдэнд үзэгддэггүй бодисоос сэрэмжлүүлдэг багаж байдаг гэдгийг хэлж байсан. Сайжруулсан түлшээ хийж байхдаа энэ багажийг давхар судлаад хэрэгжүүлсэн бол өнөөдөр ийм байдалд хүрэхгүй байсан. Сайжруулсан түлш хийсний дараа 200 тонн нүүрс бороонд норж задраад буцаагаад бэхжүүлсэн гэсэн мэдээлэл байгаа. Энэ нүүрсийг хүмүүс хэрэглээд ийм зүйл болоод байна уу гэсэн хардлага байна. Мөн дуурайлгаж хийсэн түлш байхыг үгүйсгэхгүй.

-Шинжилгээгээр түлш ямар ч асуудалгүй гэж гарсан. Харин иргэд түлшээ галлаж чадаагүй учраас ийм асуудал гарсан гэж байсан. Та энэ асуудалд ямар байр суурьтай байна вэ?

-Иргэдийг буруутгаж байгаад үнэхээр харамсаж байна. Ийм асуудал байх юм бол нийслэлийн иргэд нас бараад дуусах байх. Амиа хорлох гэж хаалтаа хааж байж гал түлдэг хэн байхав дээ. Тэгээч одоо хордлогод орсон хүмүүс энэ жил ямар анх удаа гал түлж байгаа биш дээ. Өчнөөн олон жил гэрээ галлаж ирсэн шүү дээ. Төр засаг энэ асуудал анхаарах хэрэгтэй. Гал түлээд 20-30 хүн хордоод хоёр гурваараа амь насаа алдаад байвал хэцүү биз дээ. Өчигдөр бас угаарын хийд хордож амь насаа алдсан асуудал дахиад гарсан байна. Иймээс энэ асуудалд анхааралтай хандах хэрэгтэй.