Монгол Улсын 2020 оны төсөв хэлэлцэж буйтай холбогдуулж МҮЭ-ээс өнөөдөр мэдээлэл хийлээ. МҮЭ-ийн ерөнхийлөгч Х. Амгаланбаатар “УИХ –аар Монгол Улсын 2020 оны Улсын төсвийг хэлэлцэж байгаатай холбогдуулан иргэдийн хөдөлмөр, нийгмийн хамгаалалтай холбоотой асуудлуудыг улсын төсөвт тусгуулах шаардлагатай учраас УИХ, УИХ-ын Төсвийн байнгын хороо, Засгийн газар, Сангийн яам, Хөдөлмөр, нийгмийн хамгааллын яаманд хүргүүлж байгаа”-гаа мэдэгдсэн юм.

Мөн төрийн болон төсвийн байгууллагын хөдөлмөрийн аюулгүй байдал, эрүүл ахуйн зардлын хувь хэмжээг төсвийн зардлын ангилалд оруулж, улсын төсөвт тусгаж хүргүүлэх, НХХ-ын сайдын 2004 оны “77 дугаар тушаал”-ын “Тэтгэврийг хөнгөлөлттэй тогтоох газрын дор болон хөдөлмөрийн халуун, хүнд нөхцөлд хамаарах ажил, мэргэжлийн жагсаалт”-д 1779 ажлын байруудад хийлгэсэн хөдөлмөрийн хэвийн бус нөхцлийн үнэлгээ, дүгнэлтүүдийг үндэслэн нэмэлт өөрчлөлтийг нэн яаралтайгаар оруулах шаардлагатай. Мөн нийгмийн даатгалын шимтгэлийг нэмэгдүүлэхгүй байхаар улсын төсөвт тусгаж хэрэгжүүлэх, цалин, тэтгэвэр, тэтгэмжийг нэмэгдүүлэх эх үүсвэрийг улсын төсөвт баталгаажуулж хэрэгжилтийг хангуулахад онцгой анхаарах хэрэгтэй” гэдгийг онцоллоо.