Өнөөдөр Монголын ногоон нам, Гэр хороолол хөгжлийн нам хамтран ажиллах санамж бичигт гарын үсэг зурлаа. Хурлын үеэр нийгмийн тэгш бус хуваарилалт, төрийн алдаатай бодлогоос үүдэн ард иргэдийн амьдрал ахуй баталгаагүй болж, баян ядуугийн ялгаа бий болсныг онцолж байв. Иймд өнөөдрийн нөхцөл байдалд үнэлэлт дүгнэлт өгч, намын үйл ажиллагааны чиглэлийг онцгойлон анхаарч, нэг чиглэл нэг зорилго дор хамтарч ажиллаж боломжтой талаар намын удирдлагууд хэллээ.

Хэлэлцүүлгийн хүрээнд Монголын ногоон намын дарга О.Бум-Ялагч сэтгүүлчдэд мэдээлэл өгөв.

Монголын Ногоон намаас Гэр хороолол хөгжлийн намыг дэмжиж ажиллана

-Хоёр нам хамтран ажиллах санамж бичигт гарын үсэг зурлаа. Ямар чиглэлээр хамтран ажиллах вэ?

-Монгол Улсад 35 нам байна. Эдгээрээс үзэл санаа нэгтэй, нэг ижил зорилго, чиглэлтэй Монголын ногоон нам болон Гэр хороолол хөгжлийн нам харилцан ойлголцох санамж бичигт гарын үсэг зурж байна. Монголын ногоон нам зүүны баримжаатай нам юм. Энэ нь ард иргэдийн аж амьдралыг дээшлүүлэх, татварын бодлогоор нийгмийн баялгийг шударга хуваарилах гэх мэт асуудал руу чиглэдэг. Үндсэндээ ядууралтай тэмцдэг гэж ойлгох хэрэгтэй. Гэр хорооллын хөгжлийн нам гэр хорооллын хөгжил рүү чиглэсэн бодлоготой байдаг. Энэ нь ядууралтай тэмцэх бас нэг хэлбэр болж байгаа юм. НҮБ-ын хөгжлийн хөтөлбөрөөр Монголын ард түмний гурваны хоёр буюу 62 хувь нь ядууралтай байна гэж үзсэн. Мөн Дэлхийн банкнаас “Монголчуудын 51 хувь нь ядуу, 27 хувь нь ядууралд ороход бэлэн байна” гэж үзсэн. Ядуурал нүүрлэсэн газар гэхээр гэр хороолол болж байна. Эл хоёр нам бол тэмцлийн нам. 2004 оноос хойш жагсаал, цуглаан хийж ирсэн байна. Төр засгийг шахдаг, бодлогыг дэмжиж ажиллаж буй энэ чиглэлийн үзэл баримтлалтай нам эдгээр 35 намаас Гэр хороолол хөгжлийн нам гэж харж байна. Монголын Ногоон намаас Гэр хороолол хөгжлийн намыг дэмжиж ажиллана

- Гэр хороололд чиглэсэн ямар ажлууд хийгдэх вэ?

-Монголын ногоон нам 2006 оноос гэр хорооллын газрыг эдийн засгийн эргэлтэд оруулах саналыг дэвшүүлж байгаа. Газрын тухай хуулиар нэг хүнд 0.7 га газар ноогддог. Төр засгийн энэхүү шийдвэрийг дэмжээд гэр хорооллын айл өрхүүдийн газрыг эдийн засгийн эргэлтэд оруулах нь зөв юм. Монгол Улс гадаадаас жилд 200 сая ам.долларын эрчим хүч худалдаж авдаг. Харин гэр хорооллын айл өрх нарны болон салхины эрчим хүчээ газраа ашиглан үйлдвэрлэж, түүнийг нь улс худалдаж авбал нэг айлын орлого сардаа нэг сая төгрөг болох боломжтой. Энэ чиглэлээр буюу газрыг эдийн засгийн эргэлтэд оруулахад Монголын ногоон нам, Гэр хороолол хөгжлийн нам дэмжиж ажиллана. Ажлын байрыг бий болгоно. Нийт 220 мянган гэр хорооллын айл өрх байна.Үүнээс 50 хувь нь ажилгүй байна. Ажилтай орлоготой болох талаас нь дэмжих хэрэгтэй.

-Сонгуулийн 50+26 тогтолцооны талаар ямар байр суурьтай байгаа вэ?

-Сонгуулийн тухай хуулинд 50+26 гэдэг тогтолцоог оруулж ирсэн байна. Мажоритар системийн аюул нь юу вэ гэхээр “савалдаг” онцлогтой. Монголчуудын сонголт хийж байгааг харахад итгэлийг нь алдсан улс төрийн хүчнийг болиод дараагийн улс төрийн хүчнийг сонгодог. Өмнө нь гуравдах хүчин байхгүй байсан учир ард түмэн сонголтгүй байсан. Одооноос Монголын ард иргэд хоёр намд итгэл хүлээлгэх боломжгүй болчихсон байна. Нийтдээ 35 улс төрийн нам байна. Шинэ хүч буюу Монголын ногоон нам, Гэр хороолол хөгжлийн нам, Иргэний зориг нам гэх мэт ард иргэд сонгочих магадлалтай шинэ хүчнүүд байгаа учраас МАН, АН зэрэг намууд улс төрийн тавцангаас ангид болох магадлал үүсээд байна.