Ирэх оны сонгуулийн сурталчилгааны салхи хэдэн сарын өмнөөс сэвэлзээд эхэлсэн. Одоо сонгуульд өрсөлдөх хүний намдаа хандивлах мөнгөний дүн гарсаар хойш бүр ч ширүүсч байх шиг. Сэм сэмээр орон нутагтаа хайр зарлаж, ханцуйн дотроо нуух шахам бэлэг тарааж байсан бол одоо ил цагаандаа гарч эхэллээ. Хоёр оны босгон дээр 2020 оны сонгууль угтсан сонин хачин хувилбарууд гарч ирж байна. Жишээ нь, твиттер хуудаснаа жиргээч Г.Мөнхболд УИХ-ын гишүүн Ж.Энхбаяртай өрсөлдөх хүнд хувиасаа 20 сая төгрөг өгөхөө амлаж, бас хуулийн хүрээнд бүхий л аргаар дэмжинэ гэдгээ илэрхийлжээ. Энэ үйлдлийнх нь хариуд УИХ-ын гишүүн Ж.Энхбаяр түүнийг зүгээр л “дуэль”-д дууджээ. Өөрөөр хэлбэл, Г.Мөнхболд “Яг одоо амалъя, Ж.Энхбаярын нэр дэвших тойрогт түүнтэй өрсөлдөх нэр дэвшигчдээс хамгийн өндөр магадлалтай гэсэн хүнд хувиасаа хамгийн багадаа 20 сая төгрөг хандивлах болно. Хангалттай биш ч, чамлаад байх мөнгө биш. Үүгээр зогсохгүй боломжит бүх аргаар дэмжлэг үзүүлнэ” хэмээн бичсэнийхээ төлөө “Чи өөрөө хүрээд ир” гэсэн хариу авсан байна. Европын соёлт ертөнцийнхөн бээлий шидэж, “дуэль”-д дууддаг байсан шиг л “Хүрээд ир, үзэлцье” гэсэн байх юм.

Жижиг дунд үйлдвэрлэлийг хөгжүүлэх сан /ЖДҮХС/-гаас 1.9 тэрбум төгрөгийн зээл авсан нь нэгэнт тодорхой болсон УИХ-ын гишүүн Ж.Энхбаяр эл үйлдэлдээ иргэдээс уучлалт гуйх нь бүү хэл, бүр даам гарчихсан “Чи өөрөө хүрээд ир” хэмээн цахим ертөнцөөр том дуугарч байгаа нь “Намайг хэн хэлж, нохойг хэн саах юм бэ” гэсэн омгорхол биш үү. Өөрийн гэсэн бизнестэй болж, амьдрал ахуйгаа дээшлүүлье хэмээн хуруу хумсаа хугалах шахам зүтгэж байгаа иргэдэд очих ёстой тэр зээлийг нь албан тушаал, эрх мэдлээ ашиглан өөртөө завшсан увайгүй үйлдэлдээ гэмшдэггүй юм аа гэхэд, өөрийг нь сонгосон олныг хүндэтгээд, нөгөөтэйгүүр улс төрийн тогоонд чанагдсан хүний зангараг гаргаад дуугүй өнгөрч болдоггүй л юм байх даа. Хамгийн хөнгөлөлтэй нөхцөлөөр олгох зээлийг нь хувьдаа авч, бизнесээ өргөжүүлж жижиг дундынхныг басамжилна, дээр нь “Та нар надад юу хэлэх юм бэ” гэсэн авир гаргаж биднийгээ доромжилно. Ийм хүнийг сонгосон сонгогчдын хохь гэлтэй ч биш. Яах вэ.