Казахстан улсад жолооч нартай холбоотой нэг чухал хуулийн зүйл заалт энэ оны эхнээс амьдрал дээр хэрэгжиж эхэлжээ. Тэр юу вэ гэвэл “Согтуугаар тээврийн хэрэгсэл жолоодвол 7-10 жил хорих ялаар шийтгэх буюу жолоо барих эрхийг нь бүх насаар нь хасах”-аар болсон юм байна. Манайх шиг зам тээврийн осол их гаргадаг улсад л чухам нэг мөрдмөөр хууль яах аргагүй мөн. Энэ тухай нэг танилдаа хэлбэл “Архи дарс ч амсдаггүй, лалын шашинтай улс орны хууль дүрэм манайд ямар хамаатай юм бэ” гээд халгаах шинжгүй. Мань хашир янз нь хааяа “сэнгэнүүлчихээд” хамаагүй сүнгэнүүлдэг нөхөр болж таарч байгаа юм. Тээврийн цагдаагийн албаны Урьдчилан сэргийлэх хэлтсийн дарга Э.Энхболд одоогоос сар гаруйн өмнө тодруулга өгөхдөө “Согтуугаар тээврийн хэрэгсэлжолоодсон 31 мянган жолоочийг илрүүлсэн. Энэ нь өнгөрсөн оны мөн үеэс долоон хувиар нэмэгдсэн үзүүлэлт. Жилд 31 мянган жолооч гэж тооцоолохоор өдөрт жолооч согтуугаар тээврийн хэрэгсэл жолоодсон 100 орчим зөрчлийг илрүүлдэг гэсэн үг” гэж ярьж байв. 2016 онд л гэхэд согтуу жолоочийн буруугаас болж зуу гаруй хүн амь насаа алдсан тоо баримт байна. ЦЕГ-ын Урьдчилан сэргийлэх хэлтсийн ахлах мэргэжилтэн, цагдаагийн хошууч В.Хосбаяр “Согтуугаар тээврийн хэрэгсэл жолоодсон тохиолдол олон бүртгэгдсэн. Арванхоёрдугаар сарын 31-ний өдөр гэхэд нийслэл Улаанбаатар хотод согтуугаар тээврийн хэрэгсэл жолоодсон 19 зөрчил бүртгэгдсэн бол орон нутагт 13 зөрчил бүртгэгдлээ. Согтуугаар тээврийн хэрэгсэл жолоодсоноос болж өөрийн болон бусдын эрүүл мэнд, амь насанд хохирол учруулж буй золгүй тохиолдлууд гарсаар байгаа. Хүний амь нас, эрүүл мэндэд санаатай болон санамсаргүй байдлаар хохирол учруулах тохиолдол харьцангуй их гарч байна. Монгол Улсын замын хөдөлгөөний аюулгүй байдлын тухай хууль, тогтоомж түүнд нийцүүлэн гаргасан акт, дүрмэнд зааснаар тухайн тээврийн хэрэгслийн эзэмшигч нь согтуу жолоочид жолоо шилжүүлж, тухайн хүн тээврийн хэрэгсэл жолоодвол жолоо шилжүүлсэн этгээдэд давхар хуулийн хариуцлага хүлээлгэнэ. Замын хөдөлгөөний аюулгүй байдлын тухай хуулийн 14.7 дугаар зүйлд зааснаар “Тээврийн хэрэгсэл жолоодох эрхгүй, эсхүл эрх нь дуусгавар болсон хүн согтууруулах ундаа, мансууруулах эм, сэтгэцэд нөлөөт бодис хэрэглэсэн үедээ тээврийн хэрэгсэл жолоодсон, эсхүл зохих журмын дагуу шалгуулахаас зайлсхийсэн бол албадан сургалтад хамруулж, долоогоос 30 хоногийн хугацаагаар баривчлах шийтгэл оногдуулдаг” гэж оны өмнөхөн ярьсан байна. Казахстан улсын хуулиас харахад “үнэртүүлэх төдий” байхад л жолоодох эрхийг нь насаар нь хасаж, 7-10 жилээр хорих ялаар шийтгэдэг болсон. Тэгэхэд манай хууль арай дэндүү энэрэнгүй байдаг нь хуулийн байгууллагынхны ярианаас тодорхой байна. Согтуугаар жолоо барьсан этгээдийн бараг толгойг нь илэх шахуу сургалтад хамруулж, төрийн хамгаалалтад долоогоос гуч хоног “амраадаг” гэхэд хилсдэхгүйгээр сонсогдож байна. “Монголчууд бид цөөхүүлхнээ, энх цагт эндэх ёсгүй амь” энэ тэр гэж матрын нулимс унагахаа байцгаая. Согтуу жолооч унаа барих гэвэл ердөө л Казахстан шиг жолоодох эрхийг нь насаар нь хасдаг, эсвэл олон жил хорих ял оноодог болъё. Тэгэхгүй бол хүний амь нас, эрүүл мэнд хохирч, нэг жилийн дотор сургуулийн хоёр ангитай тэнцэх хэмжээний өсвөр насныхан согтуу жолооч нарын дугуйг мялаасаар л байх болно.