Мал хулгайлах гэмт хэрэг Эрүүгийн хуулинд тусгагдсанаар гурван бүрэлдэхүүнтэй байгаа. Нэгд, ердийн бүрэлдэхүүн, хоёрт, хүндрүүлэх бүрэлдэхүүн, гуравт, онц хүндрүүлэх бүрэлдэхүүн. Ердийн бүрэлдэхүүн гэдэгт тээврийн хэрэгсэл ашиглаагүй, бүлэглээгүй, олон тооны мал хулгайлаагүй, улсын хилээр нэвтрүүлээгүй, гойд ашиг шимтэй мал хулгайлаагүй тохиолдол орно. Гэхдээ өнчин ишиг ч хулгайлсан зургаан сараас таван жилийн хорих ялтай. Өөр төрлийн сонгох ялгүй болж байгаа юм. Сая Г.Тэмүүлэн гишүүний асууж байгаа олон тооны мал гэдэг бол хүндрүүлэх бүрэлдэхүүн болж байгаа юм.

Хоёр бод хулгайлсан ч, найман бод хулгайлсан ч адилхан олон тооны мал хулгайлсанд орно. 2-8 жилийн хорих ялтай. Өөр сонгох санкцгүй. Өнчин ишиг хулгайлахдаа Портероо ашигласан бол тээврийн хэрэгсэл ашигласан гэдгээр хүндрүүлэх бүрэлдэхүүнд багтаж, 2-8 жилийн хорих ял авна. Гойд ашиг шимтэй мал гэдгийг Улсын Дээд шүүхийн тайлбарт тусгайлан заасан байгаа. Онцгой ашиг шимтэй малын талаар гэж тодотгож. Ийм мал нэгийг хулгайлсан ч 2-8 жилийн хорих ялтай. Ийм гэмт хэргийг байнга үйлдэж, амьдралын эх үүсвэр болгосон, цаашлаад бүлэглэж үйлддэг зохион байгуулалтай гэмт бүлэг үйлдсэн бол 5-12 жилийн хорих ялтай болж байгаа. Мал хулгайлах гэмт хэрэг анх 2004 оны Эрүүгийн хуулинд 123-ын зүйл заалт болж нэмэгдэж орсноос хойш анх удаагаа ийнхүү чангарсан ялтай болж байгаа юм. Мал хулгайлаад Зөрчлийн хуулиар арга хэмжээ авагдсан зүйл гэж байх ёсгүй. Мал хулгайлахад ашигласан тээврийн хэрэгслийг хураана.