УИХ-ын чуулганы өнөөдрийн нэгдсэн хуралдаанаар Эрүүгийн хуульд өөрчлөлт, Зөрчлийн тухай хуульд нэмэлт оруулах тухай хуулийн төслүүдийг эцсийн байдлаар хэлэлцэх үеэр УИХ-ын гишүүн Б.Бат-Эрдэнэ “З.Нарантуяа нарын бидний хэдэн гишүүд Малын хулгайн гэмт хэргийн талаар хуулийн төсөл өргөн барьсан. Хэлэлцүүлгийн явцад зарим саналууд нь багтаад явж байгаа. Гэхдээ бидний өргөн барьсан хуулийн төсөлд бол 24 бог, найман бод гэж байсныг тоог бууруулах биш мал хулгайлсан л бол гэж авч үзэхээр байсан. Мөн малын үйлдвэрлэл хурдан удмын гэдэг ч юм уу энэ талаас нь бус тухайн айл өрхийн амьжиргааны эх үүсвэрийг салгаж авч байгаа энэ үйл ажиллагааг хүндрүүлэх нөхцлөөр авч үзье гэж байсан. 2017 оны хуулиар хийдэл гэмээр зөрчил гараад мал хулгайлсан хүмүүс сул чөлөөтэй явдаг явдал гарсан. Малчид, цагдаатай хамтраад машин техник гаргаад, бензин тос хийгээд хулгайчийг бариад өгдөг. Зарим газар цагдаа хайхардаггүй. Хэсгийн төлөөлөгч хайхраад аймгийн төвд хүргэж өгдөг. Гэтэл нөгөө нөхөр тавигдаж ирчихээд “Цагдаа, шүүх, прокурор бүгд миний гарт аа. Та нарыг хүйс тэмтэрнээ гээд заналхийлээд байдаг. Тийм учраас энэ талынх нь юманд анхаарах ёстой байх. Арван хэргийн долоог дөнгөн данган илрүүлдэг. Үлдсэн гурав нь огт шийдэгдэхгүй байгаа. Тэгэхээр хулгайтай тэмцэх бодлого хатуу байх нь зөв. Ялын ялгамжтай байдал ямар байна вэ” хэмээж байлаа.