Хүүхдийнхээ яриаг дэмжиж буйгаа илэрхийлвэл өөртөө итгэлтэй болдог

Aдмин / Боловсрол

Хүүхдийнхээ яриаг дэмжиж буйгаа илэрхийлвэл өөртөө итгэлтэй болдог

Мэдээж хүүхэд нас бол хүн бүхний хамгийн дурсамжтай, баяр хөөр, уйтгар гуниг хосолсон аз жаргалтай үе байдаг. Энэ л насандаа бид хөгжиж төлөвшиж, ирээдүйн зан авир, мөн чанар, оюун ухаанаа олж авдаг. Тиймээс бидний ирээдүйд хэн байх, хэн болохыг тодорхойлж өгдөг хүүхэд нас, тэр тусмаа бага балчир нас гэдэг хүний амьдралын маш чухал бөгөөд хариуцлагатай үе байдаг.

Тэгвэл бид ирээдүй үе болсон хүүхэд багачуудаа хэрхэн хүмүүжүүлэх вэ? Бидний хүүхдээ хүмүүжүүлж байгаа арга барил маань зөв болов уу? буруу болов уу?

Хүүхэд тоглохдоо зөвхөн тоглоомтой харьцах бус өөрийн үе тэнгийн, болон өөрөөс ах, дүү бүх хүмүүстэй харилцах харилцааг илтгэж, суралцаж байдаг. Энэ бүх харилцаанаас хүүхэд бусдад хэрхэн зааж зөвлөх, өөрөөс ах хүнтэй хэрхэн харьцах, хүндлэх зэрэг зүйлд суралцдаг. Мөн юунд баярлах, ямар зүйлд гомдох, гомдсоноо яаж илэрхийлэх вэ? зэргийг ч бусдаас ажиглан суралцдаг байна.

Ээж, аавууд хүүхдээ төрсөн цагаас нь эхлэн өөрийн биеэрээ үлгэрлэж, зөв зүйлд хөтлөх хэрэгтэй

Эцэг эхчүүдийн хамгийн анхаарах зүйл нь өөрсдийн үлгэр дуурайлал юм. Ээж аав нь өөрөө үлгэрлэхгүй хэрнээ зөвхөн үгээрээ зааж, сургах гэвэл хүүхэд хэзээ ч хүлээн зөвшөөрч таны үгэнд ордоггүй болдог. Харин эсрэгээрээ эсэргүүцэж байдаг. Тиймээс эцэг эхчүүд хүүхдийг төрсөн цагаас нь эхлэн өөрийн биеэрээ үлгэрлэж, зөв зүйлд хөтлөх хэрэгтэй. Хүн ухамсрын болон үл ухамсарлах төвшинд аливаа зүйлийг суралцаж, суралцсан зүйл нь эргээд үйлдэл болон гардаг. Эцэг эх нь хэрэлдэх зэрэг таагүй байдал нь хүүхдийн далд ухамсарт хадгалагдан үлддэг ажээ.

Хүүхдээ сонсч сурах нь харилцааны салшгүй чухал хэсэг

Хүн бүхэн л хэн нэгэн өөрийг нь сонсоосой гэж хүсдэг. Хэн нэгэн таныг сонсож байна гэдэг нь тухайн сонсогч хүн таныг ойлгохыг хүсэж байгаа, мөн таны хэлж байгаа зүйл түүний анхаарлыг татахуйц чухал гэсэн үг юм. Энэ нь хүүхдийн хувьд мөн адил байдаг. Бусад хүмүүс ялангуяа эцэг эх нь сонсож, ойлгож, үнэлж, хайрлахыг тэд юунаас ч илүү хүсдэг. Сонсох нь харилцааны салшгүй чухал хэсэг бөгөөд ялангуяа харилцаа шинээр үүсэж байх үед эсвэл хүүхдэд бэрхшээл тулгарсан цагт энэ нь ярихаасаа ч илүү чухал хэсэг аж. Хүүхэд өсөж том болж, өсвөр нас руу шилжих үед нь тэднийг сонсож, ойлгох насанд хүрэгчтэй байх нь тэдэнд их чухал байдаг байна.

Хүүхдийнхээ яриаг дэмжиж буйгаа илэрхийлвэл өөртөө итгэлтэй болдог

Хүүхэд тантай ярьж байхад түүний яриаг дэмжиж байгаагаа илэрхийлж толгой дохиж байгаага хүүхэд хараад өөрийгөө ямар чухал эрхэм болохыг ойлгодог. Үнэ цэнээ мэдэрдэг.Ингэснээр улам итгэлтгэйгээр өөрийгөө илэрхийлэхэд суралцдаг байна.Хэрвээ санаа нийлэхгүй зүйл гарвал “Ээж нь ингэж бодож байна, аав нь ярьж байгаа зүйлтэй нь санаа нийлэхгүй байна., гэхдээ чиний санааг бодож үзье, миний санааг чи бодоод үзээрэй” гэх мэтээр санаа оноогоо илэрхийлбэл хүүхэд аливааг бодож, эргэцүүлэх ухаан, санаа оноогоо хуваалцах, сонголт хийх, шийдвэр гаргах зэрэгт суралцаж байдаг.

Томчууд хүүхдийнхээ ярианы агуулгад анхаарвал хүүхдээ яг юу хүсээд байгааг ойлгож чадна. Ер нь хүүхэд тантай ярихыг оролдож байна гэдэг нь тантай ойр дотно байж, харилцахы хүсэж байгаа л гэсэн үг. Хүүхэд эцэг, эхдээ маш олон зүйлийг ярих хүсэлтэй байдаг. Тэднийг анзааран сонсвол хүүхдэдээ дэвтэр хэрэгтэй байгааг, бие нь өвдсөн байгааг, сэтгэл нь баяртай байгааг, эсвэл гунигтай байгааг, ямар нэгэн зүйл хэрэгтэй байгааг, ээжтэйгээ хамт баймаар байгааг, аавтайгаа тоглохыг хүсэж байгааг, тэднээр тэврүүлмээр байгааг, урам хэрэгтэй байгааг, хайрлуулмаар байгааг гэх мэт олон зүйлийг мэдэж болно.

Тэгвэл хүүхдэд эцэг эхээ анхааран сонсоход юу саад болдог вэ?

Ярьж байгаа хүний гол санааг алдуулж, анхаарлаа хандуулахгүй байх: Жишээ нь:”Өөр юмны талаар яриач.Үүний талаар дахиж битгий бод”

Шүүх, буруушаах, загнах: Жишээ нь:”Чи ч ёстой тэнэг юм”,”Би чамд хэдэн удаа үүнийг хэллээ, чи... ёсгүй, хэрэггүй байсан юм”, “Чи яах гэж тэгсэн юм?”,”Чи тэгэхээсээ ичихгүй байна уу?”,”Ямар мулгуу юм хийгээ вэ? Мангар юм уу хаашаа юм”...

Хүүхдийн буруу зан үйлийн үндсэн шалтгааныг тодруулахгүйгээр хүүхдийг буруутгах:Жишээ нь: “Чи дандаа л хэрэлдэж байх юм”, “Чи л ийм нөхцөл байдлыг үүсгэсэн шүү дээ”, “Энэ чиний л алдаа”...

Хүүхдийг гутаах, доромжлох: Жишээ нь: “Чиний хийж чадах хамгийн сайн чинь энэ гэж үү?”, “Чи ямар ч хэрэггүй юм”, “Чи ямар ч юмыг зөв хийнэ гэж байхгүй шүү”

Хүүхдэд саад болох: Жишээ нь: томчууд хүүхдийн үгийг тасалж “Гэвч...”-вэл яасан юм”, “Энэ яагаад....” гэх мэт үгнүүдээр хүүхдэд түүх, болсон зүйлсээ ярьж цаг аван, өөрийнхөөрөө ярихад нь саад болдог.

Хүүхдийг хэтэрхий өрөвдөх, халаглах: Жишээ нь: “Өө ямар аймаар юм бэ! Чамд яагаад байнга ийм өрөвдөлтэй юм тохиолдоод байна аа?”, “Чи дандаа л азгүй байх юм”, “Яасан өрөвдөлтэй юм бэ. Дахиад л багшдаа загнуулчихсан уу?” гэх мэт тайлбар хийх нь хүүхдийг улам сул дорой, өөртөө итгэлгүй болгодог.

Тушаал өгөх, сүрдүүлэх: Жишээ нь: “Чи яг одоо наад ажлаа дуусгах ёстой шүү”, “Надтай ингэж харьцсан хэвээр байвал чинь зодуулна гэж мэдээрэй”,”Чи дахиад энэ алдааг давтвал би чамайг уучлахгүй шүү”

Мэдээж хэрэг хүүхдийг хүмүүжүүлэх хамгийн сайн арга гэж байхгүй, харин хүүхэд бүрийн онцлогт нь тохирсон хүмүүжүүлэх арга гэж байдаг. Суурийг нь сайн тавьбал дээш нь хэдэн ч давхар барьж болно. Үүнтэй адил бага насанд нь ямар хүмүүжлээр ямар төлөвшил чадварыг суулгана, тухайн хүүхдийн ирээдүй тийм л байна. Хүүхэд сайн ном уншдаг, мэдлэгтэй байна гэдэг нь сайхан амьдрахын нэр биш, харин сайхан амьдрах арга ухаанаа ойлгосон, өөрийнхөө төлөө хичээж, тэмүүлж чаддаг байх нь сайхан амьдралын эх үндэс билээ.


Сэтгэгдэл

Зочин [66.181.185.81] 2020-07-30 08:54:26

Баярлалаа.


1 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
1 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.