Жүжигчин Б.Цэцэг өчигдөр олон нийтэд хандан үзэл бодлоо илэрхийлсэн байна. Тэрээр гоо үзэсгэлэнтэй нэгэн гэдгээрээ олонд танигдаж байсан бол одоо өөрийн үзэл бодол, улс төрийн хандлагаараа олны анхаарлыг татдаг болсон гэж хэлж болно. Өчигдөр жүжигчин Б.Цэцэгийн хийсэн мэдээллийг сонссон иргэд түүнийг шударга байна хэмээн сайшааж байв. Учир нь тэрээр 2020 оны сонгуулиар МАН-аас сонгогдсон гурван гишүүн болон Х.Ганхуяг, Г.Амартүвшин, Г.Дамдинням нарын холбогдсон 33 тэрбумын хэргийн талаар ярилцжээ. Тэрээр хэлэхдээ, “Ганган гоё, боловсролтой, маш сайхан залуучууд үлгэр шиг гарч ирсэн...Та гурав яаж гэж ингэж ард иргэдийг хуурч чадав аа. Гүрийж байгааг чинь хараад ичиж байна.

Мөн 2020 онд Дарханаас сонгогдсон Г.Дамдиннямаа та иргэдийнхээ итгэлийг бүрэн алдлаа.

Ганхуяг, Амартүвшин нараа та бүхнийг би үнэхээр дэмжиж байсан. Нэгдүгээрт, залуу хүмүүс, хоёрдугаарт үзэл санаандаа үнэнч тууштай байж монголын хөгжлийг бидний өмнө авчрах залуус гэж итгэж байсан. Маш олон залуусаас мандат аваад дэвшиж байсныг чинь хараад би дэмжиж ярьж байсандаа иргэдээс уучлал гуймаар байна. Гэтэл тэд маск өмссөн хүмүүс байж. Би ширээний ард сууж байхдаа тэднээс асууж байсан, танд хэдэн дүр байгаа вэ гэж. ...

Ганцхан дүрээрээ амьдарсаар байгаад үхнээ гэж хэлж байсан бичлэг чинь миний гарт байна. Хэдэн маск өмсөж амьдрах гэсэн юм бэ залуусаа, яагаад ард иргэдийн итгэлийг ингэж муухай хөсөрдүүлж байна вэ. Сонгуулиар та бүхэнд итгэж нэрийг нь хараар бөөрөнхийлөөд дугуйлсан иргэдийнхээ нуруун дээр нь гишгээд ийм их маск зүүж, яагаад биднийг хууран мэхлэх болов оо. Энэ бүх зүйл хуулийн дагуу явсан гэж Амартүвшин шарк МҮОНТВ-ээр өнөөдөр ярих гэж байх шиг байна. Хөгжлийн банк чинь Монгол Улсыг хөгжүүлэх төслийг санхүүжүүлдэг болохоос машин оруулж ирдэг компанийг 33 тэрбумаар санхүүжүүлэх ёстой юм уу. Ард түмэн та нарыг гаргаж чадсан юм чинь буулгах эрх нь бидний гарт байх ёстой гэлээ. Мөн Монгол Улсын Хөгжлийн банкнаас 33 тэрбум төгрөг зээлдсэн УИХ-ын гишүүн Х.Ганхуяг, Г.Дамдинням, Г.Амартүвшин нарыг ард түмнээсээ ичих хэрэгтэйг санууллаа. Монгол Улсад ер нь шударга ёс байна уу. Өнгөрсөн хугацаанд ЖДҮ дэмжих сангаас зээл авсан УИХ-ын гишүүд ял аваагүй зөвхөн торгуулаад өнгөрч байсан. Сүүлийн 60 хоног ЖДҮ-ийн зээл олгогдохоо больсон байгаа. Төсөв мөнгө байхгүй гэсэн.

ХӨГЖЛИЙН БАНКНААС 33 ТЭРБУМЫН ЗЭЭЛ АВСАН ГУРВАН ГИШҮҮНИЙ АСУУДЛЫГ КОВИД БОЛОН БУСАД МЭДЭЭЛЛЭЭР ДАРААД МАРТАГНУУЛЖ БОЛОХГҮЙ!

Гэтэл Шарк Г.Амартүвшин гэгч этгээд нь 6 сарын турш Хөгжлийн банкны захирлаар ажиллаж байхдаа, хамаарал бүхий этгээдүүддээ ямар байдлаар 33 тэрбум төгрөгийн зээлийг үзүүлчихэв ээ. Та бүхэн энэ сэдвийг одоо дараад өнгөрөөж болохгүй. Гурван гишүүн 33 тэрбум төгрөгийн зээл авсан ноцтой мэдээллийг Нэгдүгээр төрхөд төрсөн эх ковидын халдвартай нь тогтоогдлоо, МҮОНТВ-ийн захирал Д.Дэмбэрэл албан тушаалаасаа огцров гэдэг мэдээллээр та бүхний анхаарлыг сарниулах гэж байна. Үүний үр дүнд иргэд бид л хохирч байна. 60 тэрбумын хэрэгт орооцолдсон нөхдүүдийг унагаж У.Хүрэлсүх өнөөдрийн Засгийн газраа байгуулж гарч ирсэн. Гэтэл дээрх 60 тэрбумын хэрэгтнүүдэд хариуцлага тооцсон уу. Бүгд л торгуулаад л өнгөрсөн. Бүгд нарсанд биш наранд явж байгаа. Дээрх хүмүүсийн мөнгийг бид төлөх ёстой юу. Дээрээс нь Хөгжлийн банк 2010 оны 07 сарын 02-нд Засгийн газрын тогтоолоор байгуулагдаж байсан. Тэгээд энэ Хөгжлийн банк хөгжлийн бодлогыг дэмжиж зээл өгсөн үү. Тэтгэврийн санд байх ёстой мөнгийг аваад идчихсэн МАН-ын гишүүн авгай хүртэл 40 сая төгрөгөөр торгуулаад л гадуур сул чөлөөтэй явж байгаа шүү дээ хэмээн ард иргэдийн өмнө тулгамдсан асуудлаар үзэл бодлоо илэрхийлсэн байна.