Булган аймгийн Могод сум руу гуравдугаар сарын 21-ний өдөр зорчсон 3 иргэний нэгээс Корона вирус илэрсэн тухай мэдээлэл түгээд байна. Тодруулбал, шинжилгээнийхээ хариуг хүлээлгүй явсан иргэдийн нэг вирустай байсан юм байна. Энэ тухай Булган аймгийн Засаг даргын Тамгын газрын албан ёсны хуудаст “Нийслэл Улаанбаатар хотоос Булган аймгийн Могод суманд зорчин ирсэн 3 иргэний нэг нь Ковид-ийн халдвар авсан болох нь шинжилгээгээр батлагдаад байна. Тус иргэд 21-ний өдрийн 10 цагийн орчимд Могод суманд ирсэн бөгөөд мөн өдрийн орой 22 цагийн орчимд Улаанбаатар хот руу буцсан. Нөхцөл байдалтай холбогдуулан аймгийн Онцгой комиссын шуурхай штаб яаралтай горимоор хуралдаж, хариу арга хэмжээний 1 дүгээр багийг Могод суманд ажиллуулж байна. Тус арга хэмжээний баг нийслэл Улаанбаатар хотоос ирсэн иргэдийн зорчсон маршрут, уулзсан иргэд, үйлчлүүлсэн дэлгүүр зэрэг ойрын хавьтал болох иргэдийн мэдээллийг тандан, сумаас орж, гарах хөдөлгөөнийг бүрэн хааж ариутгал, халдваргүйжүүлэлт хийх ажлыг шуурхай зохион байгуулан ажиллаж байна. Иймд иргэд та бүхэн болзошгүй эрсдэлээс урьдчилан сэргийлж амны хаалтаа тогтмол, зөв зүүж, олон хүн цугларсан газар очихгүй байх, хүн хоорондын зайг баримтлах, гэртээ зочин урихгүй байж, ариутгал халдваргүйжүүлэлтийг тогтмол хийхийг анхааруулж байна. Булган аймгийн онцгой комисс” гэжээ.

Албан бус эх сурвалжийн мэдээлж буйгаар тус сумын иргэн Б.Т нь нутагтаа очиж хурдан морины уралдаан зохион байгуулжээ. Ийнхүү тухайн сумын болон ойрын нутгийн уяачид цугларсан нэг өдрийн бэсрэг наадам зохиогдсон байна. Гэтэл Б.Т нь шинжилгээний хариугаа хүлээлгүй сумандаа зорчсон байжээ. Ийнхүү Б.Т нь хөл хорионы дэглэмийг зөрчсөний улмаас халдвар тархах, ьирусын шинэ голомт үүсэх эрсдэл бий болсон байна. Мөн хаврын морин уралдааныг хориглосон үед уралдаан зохион байгуулсан гэх мэтээр хариуцлагын нэлээд асуудал үүсэх бололтой.