Монголын ард түмэн хэтэрхий дураараа, улстөрчид нь хэтэрхий эмзэг л дээ. Тэр дундаа ажил авсан дарга нар нэр хичээсээр ажлаа умартаж асуудлыг даамжруулдаг, үр дүнгүй болгодог нь гарцаагүй үнэн.

Үнэндээ сошиалын савалгаа харж ажлаа төлөвлөдөг дарга Монголд цөөнгүй байна. Фэйсбүүк, твиттерийн пост бичсэн цөөхөн хэдэн хүнийг аялдан дагаад байлгүй ажлаа хийх ёстой атал Монголын төр маш олон удаа сошиал орчины шүүмжлэлээр шийдвэрээ өөрчлөхийг бид харлаа.

2012 оны үеэс эхлэн Өдрийн сонин “Монголын төрийг АН, МАН бус твиттерчид удирдаж байна” гэж хэлж, бичсээр байгаа нь зүгээр нэг хий үг биш. Төрийн бодлого шийдвэр эргэж буцдаггүй, гарсан бол хэрэгждэг, төлөвлөсөн үр дүндээ хүрдэг байх ёстой учраас “Өдрийн сонин” энэ үгийг хэлдэг байх. ​Тэр дундаа Засгийн газрын шийдвэр эргэж буцаад байж болохгүй. Сошиалд хэдхэн хүн сөрөг пост орууллаа гээд шийдвэрээ өөрчилдөг байж бүр болохгүй.

Сүүлийн хэдэн өдөр вакцин хийнэ, хийхгүй гэж хэдэнтээ эргэж буцан ард түмнээ тамалсан Улсын онцгой комисс өнөөдөр автобусны асуудал руу ороод явчихлаа. Автобус ачаалал ихтэй байна гэсэн шүүмжлэлийг фэйсбүүкт зарим хүмүүс хэлсэн бололтой. Хаанахын юм нэг гэр хорооллын эцсийн буудал дээр нэг автобус дүүрэн хүнтэй байгаа бичлэг харагдах нь харагдсан. Тэглээ гээд хөдөлгөөнд оролцох автомашины дугаарыг цагдаа, цэрэг нь бүртгэж аваад уулзвар болгон дээр жагсаалтаас номероор нь шүүж хөдөлгөөнд оролцуулна гэдэг бол Улсын онцгой комиссын хамгийн тэнэг шийдвэр. Ер нь хөл хориод, өөрсдийнх нь амь нас, эрүүл мэндийг төр засаг нь хамгаалахын тулд онцгой дэглэмд шилжүүлж байхад аятайхан байж чадахгүй бол автобусаа ч гэсэн зогсоо.

Хорьж байгаа юм бол хорьсон шиг хорь. Үнэндээ зөвшөөрөгдсөн салбарын ажилчид нь бус гэртээ хоригдох ёстой жирийн иргэд нь гадуур сэлгүүцэж, шаардлага тавьсан албан хаагчдын өөдөөс хэрүүл хийн хэсч байгаа юм билээ. Ажлынхаа тодорхойлолтыг үзүүлээд суу гэсэн шаардлагад “Чам шиг юманд би шалгуулдаггүй юм” гээд зогсож байгаа өвөөг өмөөрөх хүсэл үнэндээ алга. Хэсэх дуртай юм бол явган явцгаана биз. Улсын онцгой комисс хоёр, гуравхан пост харчихаад айж сандраад байлгүй эхний шийдвэрээ хамгаалсан шиг хамгаалж, ажлаа нэр төртэй хий. Хоёрын хооронд шүүмжлэлээс айх байсан юм бол яах гэж энэ хүнд нөхцөлд ажил авсан юм.

Өнөөдрийн үүсээд байгаа асуудал бол төрийн хэн нэгний шийдвэрт биш иргэн Батаад байна гэж харж байна. ​Өдрийн сонин нэгэн цагт “Сошиалчид бол сэтгүүлзүйн траншейнийхан” гэж бичиж, нийтэлж байсныг энд дахиад хэлчихье. Ганц пост харчихаад салгалж гүйгээд, гаргасан шийдвэрээсээ эргэж буцаад байлгүй эр зоригтой байцгаагаач. Өмнөх цагаан сарын хориог бодвол энэ удаагийн онцгой дэглэм олон нийтийн бухимдлаас ангид, иргэн хүний эрх ашгийг онц ноцтой зөрчөөгүй их давгүй үргэлжилж байгаа ажиглагдаад байгаа юм шүү. Улсыг удирдаж, түмнийг манлайлж ажжиллана гэдэг ухаан, туршлагаас гадна эр зориг, зарим золиосыг шаарддаг сангддаг. Эр зориг гаргаж зарим зүйлийг зольж чадахгүй юм бол чаддагт нь байраа тавьж өгөх хэрэгтэй.