Өчигдөр Засгийн газраас хатуу хөл хориог 14 хоногоор сунгах шийдвэр гарсан. Үүнийг ард иргэд дэмжихгүй байгаагаа илэрхийллээ. Сонгинохайрхан дүүргийн 38 дугаарр хорооны иргэн Х.Чинзориг: Би Хархорин захын үүдээр жижиглэнгийн бараа зарж гэр бүлээ тэжээдэг. Хөл хориог сунгаж байгаад үнэхээр дургүй хүрч, хатуу хөл хорионд хэцүү байна. Надад ямар ч орлого алга. Таньдаг мэддэг хүнээсээ мөнгө зээлж амьдарсаар одоо надад мөнгө зээлэх ч хүнгүй боллоо. Гараад ажлаа хийгээд мөнгө олмоор байгаа ч хатуу хөл хорио тогтоочихлоо шүү дээ. Сүхбаатар дүүргийн 17 дугаар хорооны иргэн н.Бат: Миний бие Чингэлтэй дүүрэгт хоолны газар ажиллуулдаг. 2019 онд Банк бус санхүүгийн байгууллагаас өндөр хүүтэй зээл авч ажлаа эхлүүлж байсан. Ковид гарах хүртэл зээлээ нэлээн төлсөн ч үлдэгдэл байгаа. 2020 он тэр чигтээ хөл хорионд байсан учраас бизнес маань олигтой яваагүй. Энэ хугацаанд өөрийн хадгаламж, компанийн мөнгөөр түрээс, зээлийн хүү болон бусад зардлаа төлөөд дууслаа. 2021 онд түр хугацаанд ажилласан. Ингэхдээ одоо ингээд гоё болж байна зээлээ төлж дуусгана, ажилчдынхаа цалинг тасалдуулахгүй тавина гэж бодсон дахиад л удаан хугацааны хөл хорионд орлоо. Одоо энэ газраа хаах уу яах вэ. Нэгэнт эхэлсэн энэ бизнесээ бас ингээд хаах миний хувьд харамсалтай байгаа учраас одоохондоо шийдээгүй байна. Сая иргэдэд өгсөн 300 мянган төгрөг ААН-үүдэд ямар ч дэмжлэг болсонгүй. Ковидоос айгаад гэртээ эдийн засгийн дарамттай сууснаас ковидтойгоо зэрэгцээд эдийн засгийн дарамтгүй баймаар байна. Би зүгээр л ажлаа хиймээр байна. Яг үнэндээ ковидоос болж биш томчуудын буруу шийдвэрээс л болж ард иргэд хэцүүдэж байна шүү дээ. Чингэлтэй дүүргийн 2 дугаар хорооны иргэн Н. Отгонцэрэн: Хөл хорионы уршгаас болж бизнес маань зогсон дамдуурч байна. Хүч хөдөлмөр, хөлсөө дуслуулан босгосон амьдрал маань нүдэн дээр минь нуран уналаа. Ахиад хөл хорио сунгавал үүний дараа бизнесээ ахин хөл дээр нь босгох аргагүй болох нь ээ. Анхны хөл хорио тавигдсан цагаас эхлээд тэссээр ирлээ. Одоо бид цаашид хэрхэн амьдрах вэ. Шийдвэр гаргаж байгаа удирдах албаны эрх мэдэлтэн, өндөр албан тушаалтнууд нь ард иргэдийнхээ яаж амь зууж, яаж туйлдаж байгааг одоо анзаарах хэрэгтэй байна. Хөл хориог ахин сунгаж байгааг үнэхээр эсэргүүцэж байна. Сонгинохайрхан дүүргийн 20 дугаар хорооны иргэн Ө. Хонгорзул: Би гоо сайхны хэрэгсэл заран амьдралаа авч явдаг өрх толгойлсон ээж хүн. Цар тахал дэгдэн, хөл хориотой болж ажил маань нэг жилийн хугацаанд маш олон удаа хаагдаж байна. Энэ хугацаанд лангууны түрээс, банкны өр зээл, байрны түрээс зэрэг төлбөрүүдээ төлөх ёстой байгаагийн зэрэгцээ үр хүүхдүүдээ өлсгөхгүй, зовоохгүй авч явах хатуу давааг туулж явна. Энэ удаагийн хөл хорионд нэг сарын хугацаанд УОК-н шийдвэрээр ажил маань зогсож нэг төгрөгний орлогогүй байна. Гэсэн ч лангууны түрээсийн төлбөр нэхэгдсээр л байна. Ямар ч ажил хийгээгүй, орлого олоогүй бид чинь яаж түрээсээ төлөх вэ дээ. Одоо энэ ямар ч үр дүнгүй хөл хориог таслан зогсоохыг уриалж байна. Бид ажлаа хийж хүн шиг амьдрахыг хүсэж байна.