Монгол улсын шинжлэх ухааны академийн ерөнхийлөгчийн тушаалаар Л.Оюунд шинжлэх ухааны докторын зэрэг олгож өнөөдөр дипломыг нь гардуулж өглөө.

Л.Оюун нь “Монгол улсын иргэдийн санхүүгийн боловсролын тогтолцооны онол, арга зүйн судалгаа” сэдвээр Боловсрол судлалын шинжлэх ухааны доктор (Sc.D)-ын зэрэг хамгаалсан юм.

Тэрээр ОХУ, Санктпетербургийн Их Сургуулийг 1973-1978 онд суралцан Эдийн засаг, улстөр эдийн засгийн ухааны багш мэргэжлээр төгсчээ. Улмаар МУИС, БНСУ, Австрали, ХБНГУ, АНУ-д санхүү, эдийн засгийн чиглэлээр мэргэжил дээшлүүлсэн байна.

Л.Оюун нь “Олон улсын банкны тогтолцоо”, “Мөнгө, банкны үйл ажиллагаа, мөнгө-зээлийн бодлого”, “Мөнгө зээлийн бодлогын онолын үндэс”, “Мөнгө зээлийн бодлогын онолын үндэс 5 боть”, “Арилжааны банкны маркетинг”, “Арилжааны банкны дампуурал”, “Хувь хүний санхүүгийн онол, арга зүй”, “Хувь хүний санхүүд нөлөөлдөг хүчин зүйлс” гэх мэтчилэн 15 сурах бичиг, 30 гаруй ном гарын авлага хэвлүүлжээ. Түүнчлэн гадаад дотоодын олон төсөл хөтөлбөрийг санаачлан оролцож, 20 орчим эрдэм шинжилгээний илтгэл, өгүүлэл бичиж олны хүртээл болгоод байна. Тэрээр мөн 13 докторын ажлыг удирдаж хамгаалуулсан эрдэмтэн багш юм.

Л.Оюун доктор өдгөө МУИС-д багшлахын зэрэгцээ СЗХ-ны бодлогын үнэт цаасны зах зээлийн удирдлагын зөвлөлийн гишүүн, Бизнесийн удирдлагын эрдмийн зэрэг цол олгох зөвлөлийн гишүүнээр сонгогдон ажиллаж байна. Үүнээс гадна Л.Оюун докторын зохиосон “Өрхийн төсөв” дэвтэрийг нэр бүхий банкууд ББСБ-уудын харилцагчиддаа ашиглуулахаар хамтран ажилласан нь үр бүтээлтэй ажил болсон юм. Мөн ЕБС-н ахлах ангийн Сонгон гүнзгийрүүлсэн “Бизнес судлал” хичээлийн хөтөлбөрийн багт ажиллаж, хэвлэл мэдээллийн байгууллагуудтай хамтран олон нийтийн санхүүгийн боловсролын дээшлүүлэх зорилго бүхий ярилцлага, нийтлэл, лекц олныг зохион байгуулж иржээ.