Б.Пүрэвдорж: Тэтгэврийг долоон жилээр биш таван жилээр тогтоолгох тухай хуулийн төслийг мөн түүнчлэн 2018 оноос хойш 7 жилээр тогтоолгосон хүмүүсийг 5 жилээр нөхөн бодох, цаашдаа тэтгэвэрт гарах хүмүүсийг 5 жилийн дунджаар тэтгэвэрийг тогтоох хуулийн төслийг өргөн барьсан. Арванэгдүгээр сард нэлээн тэмцэж байж хэлэлцэх асуудлын жагсаалтад оруулсан.

Харамсалтай нь НББХ-гоор хэлэлцсэнгүй. НББХ-ны дарга өөрөө энэ хуулийг түүхий хууль байна гэж юм яриад байгаа. Түүхий болсон юм ерөөсөө байхгүй. Өөрөөр хэлбэл 30, 40 жил шударгаар, өндөр хувиар нийгмийн даатгалаа төлсөн тэр хүмүүс 5 жилээр л тэтгэврээ тооцоолж авая гэдэг ийм л хууль байгаа. Тэгэхээр МАН бол түүхэндээ дандаа 5 жилээр л ажлаа төлөвлөдөг нам. Гэтэл ард түмэндээ тэтгэвэр олгох болохоороо 7 жил болгочихдог.

Тэтгэврээ анх тогтоолгож байгаа хүмүүс дордохын 7 жилээр тэтгэвэр тогтоолгоод ирэхээр анхнаасаа бүтэлгүйтээд байна.

Тийм учраас энэ хуулийг яаралтай хэлэлцэх шаардлага байна. Барааны үнэ 2018 оноос хойш 52 хувиар өсчихлөө. Энэ барааны үнэ чинь орлого багатай, тэтгэвэр авдаг хүмүүст хамгийн хүнд дарамт болж очдог.

Өнөөдөр цалин өндөртэй хүмүүст бол 1200 төгрөгөөр талх авч байгаад 1500 болохоор нэг их асуудал биш. Гэтэл энэ хүмүүст бол маш том дарамт болж очиж байна.

Энэ тооцоолол түүхий байгаад байх юм ерөөсөө байхгүй. 2, 3хан тоо байгаа. Өөрөөр хэлбэл дунджаар сар болгон 120 мянган төгрөгний тэтгэвэр нэмж авах юм. Насан туршдаа нэмж авах боломжийг энэ хуулийн дагуу бий болгож байгаа.

Энэ хууль хэрэгжсэнээр нийт 140 мянга гаруй иргэд хүртэж, 16 орчим тэрбум төгрөгний зардал гарах юм. Энэ чинь Богдзонхов бурханы чинь тал мөнгө. 140 мянган хүний асуудал шийдэж байна.