Хүүхдийн мөнгөн хуримтлалыг мөнгөн хэлбэрээр авах хүсэлтээ цахим болон биечлэн сар бүр гаргахаар болсон. Тэгвэл энэхүү сар бүр хүсэлт гаргаж буй журмыг өөрчлөхөөр болжээ.

Энэ талаар Хөдөлмөр, нийгмийн хамгааллын сайд А.Ариунзаяа:

Сар бүр хүсэлт гаргахад хүндрэл үүсэх нь гэж харж байна. Өнөөдрийн байдлаар 500 мянга орчим хүүхдийн хүсэлт ирсэн байна. Цахим хэрэглээ байхгүй байгаад иргэд Хөдөлмөр, халамж үйлчилгээний ерөнхий газрын бүхий л хэлтсүүдээр дамжуулан, хүсэлтээ гаргаж байна.

Цахимаар биш биеэрээ хүсэлтээ гаргаж буй иргэдийн хүсэлтийг жилээр нь бүртгэж авч байна. Харин цаашид бүх хүмүүсийн хувьд хэрхэн жилдээ нэг удаа хүсэлт авдаг болох талаар хуулийн гаргалгааг хайж байна.

Нэгдүгээр сардаа хүсэлтүүдийг нь бүртгээд, 20-нд хүүхдийн мөнгийг олгоно.

Хүсэлтээ илэрхийлсэн хүмүүсийн одоо авч буй дансанд нь мөнгө нь шилжинэ. Иргэд одоо хүүхдийнхээ нэр дээр банкинд данс нээчихсэн байгаагаа хуримтлал гэж ойлгож байна. Тэр бол биш. Төрийн санд хүүхдийн нэрийн дансанд нь хуримтлагдахыг бэлнээр авахгүй, хуримтлуулна гэж хэлж байгаа.

Сар бүр хүү бодогдоно, жилийн эцсээр хүү нь бодогдож орно.

20-ноос өмнө хүсэлтээ илэрхийлж амжаагүй бол тухайн сарын мөнгө нь Төрийн сан дээр хүүхдийн нэрийн данс дээр бүртгэгдэж орно. Харин банкин дээр очоод “мөнгөө авъя” гэхэд нь банкны ажилтнууд системээрээ дамжуулаад бэлнээр хүлээж авах хүсэлтийг явуулах зохион байгуулалттай ажиллаж байна. Банкин дээр 20-нд оочир их гарвал хугацаа хамаарахгүйгээр хүсэлтээ явуулсан үед шууд шилжүүлгийг хийнэ.