Зүгээр энгийнээр бодоод үзье л дээ. Халтмаагийн Баттулгыг хурал зарлахаар мянга мянган гишүүд явж очоод байх мөртөө, та нарыг гудамжинд гарахаар үсдэж зодоод, гурил цацаад байгааг л та нар тайлбарлаад өгчих. Үүнийг л эхлээд тайлбарлаад өгчих.

Коммунист фашист нийгэмд л даргыг дээрээс томилдог юмаа гэдгийг өнөөдөр дэлхий даяараа ойлгодог болчихоод байхад гишүүдийнхээ саналаар даргаа сонгодог Улс төрийн намын дарга болох гэж зүтгээд байгаа хүмүүс хэдхэн алхмын цаана мянга мянгаараа сууж байгаа гишүүдтэйгээ уулзах тухай бодож ч зүрхлэхгүй байгааг та нар яг одоо тайлбарлаад өг? Элбэгдоржоо? Эрдэнээ, Үүлэн Үстээ? Битаан Ганбат аа? Би нэг л зүйлийг асууя. Та нар үнэхээр өөрсдийгөө АН-ын дарга нар мөн гэж бодож байгаа юм бол, та нар үнэхээр АН-ын гишүүд та бүхнийг хүлээн зөвшөөрнөө гэж бодож мөрөөдөж чадаж байгаа л юм бол яг одоо гараад УДШ-ийн гадаа суулт зарлаж байгаа гишүүдтэйгээ очоод уулзчих. Хэрвээ тэр хүмүүс та бүхнийг хүлээн зөвшөөрөх юм бол та нарыг айлгаад байдаг Баттулгыгаа тэдний хажууд зогсоож байгаад ахиад нэг сонгууль зарлачих. Шулуухан хэлэхэд яг ингээд гишүүдийнхээ нүдэн дээр “Ахиад нэг халзагная аа” гэж хэлбэл тэр Баттулга чинь За гэжл хэлнэ дээ. Та нарыг бодвол юм үзсэн эр хүн. Үүнийг л та нараас хүсье.

Чаддаг юм бол та нар яг одоо гараад ДШ-ийн гадаа сууж байгаа гишүүдтэйгээ очоод уулзчих. Танай намын дүрмэнд даргыгаа сонгодог болохоос биш Төрийн Ордноос зарладаг гэж заагаагүй. Үүнийг л хүсье. Эцэст нь хэлэхэд улс төрийн намын даргыг гишүүд нь сонгодог болохоос биш УДШ-ээс томилдоггүй юмаа. Тиймээс танай намын дүрмэнд “АН-ын даргыг МАН-аас санал болгож, УДШ-ээс томилно” гэж заагаагүй л юм бол одоо гараад гишүүдтэйгээ уулз.