Засаг хөдлөх нь тодорхой болсон энэ үед Л.Оюун-Эрдэнийн танхимд хэн нь үлдэх, эс үлдэх тухайд нийгэм хэлэлцэж байна. Энэ удаагийн “Явах уу, үлдэх үү” булангийн эзэн Батлан хамгаалахын сайд Г.Сайханбаяр. Тэрбээр уг албанд томилогдоод яг хоёр жилийг үдэв. Түүний батлан хамгаалахын салбарыг удирдаж байгаа хугацаанд Монголын армид хар бараан үйл явдал бишгүй өрнөлөө.

Хамгийн сүүлийн жишээ гэхэд өнгөрсөн баасан гариг буюу наймдугаар сарын 19-ний өглөө Хилийн цэргийн 0306 дугаар ангийн салбарын орлогч, ахлах дэслэгч зэвсгийн осол гаргаж, биедээ гэмтэл учруулсан байна. Арваад хоногийн өмнө цэргийн ангийн барилга дээр ажиллаж байсан 017 дугаар ангийн дэд ахлагч тогонд цохиулж нас барсан. Зэвсэгт хүчинд тохиосон энэ уй гашуутай залгаад 327 дугаар ангид хугацаат цэргийн алба хааж байсан байлдагч залуу Хэрлэн голд живж хорвоогийн мөнх бусыг үзүүллээ. Мөн улсын баяр наадмын үеэр Өмнөговь аймгийн Зэвсэгт хүчний 167 дугаар ангийн цэрэг барилга дээр ажиллаж байгаад өөд болсон. Дээрх золгүй явдлуудаас гадна өнгөрсөн зургадугаар сард дотоодын цэргийн 05 дугаар ангид алба хааж байсан 18-хан настай хүүгийн ходоод нь задарч харамсалтайгаар нас барсан хэрэг нийгмийг цочирдуулж байв. Одоо хүртэл энэ хэргийн учир шалтгаан тодорхой болоогүй. Энэ мэтчилэн Монголын армид ардын хүүхдүүд ар араасаа амиа алдсаар байг уу. Нас барсан цэргийн тоо хоног, хоногоор нэмэгдсээр байг уу. Монголын армид эрүүл саруул очсон аавын хөвгүүд эрэмдэг зэрэмдэг, эсвэл шарил нь буцаж ирдэг боллоо.

Г.Сайханбаярыг ажлаа авснаас хойш арваад цэрэг армид амиа алджээ. Энэ бол батлан хамгаалахын салбар ямар ч бодлогогүй эмх замбараагүй, эх захгүй явж байгаагийн наад захын жишээнүүд. Уг нь Г.Сайханбаяр генералыг анх сайдаар томилж байхдаа Ерөнхийлөгч У.Хүрэлсүх туйлын аз жаргалтай сэтгэл хангалуун байсан. Тухайн үед Ерөнхий сайд байсан тэрбээр “Батлан хамгаалахын салбарыг мэргэжлийн хүн удирдах болсонд сэтгэл хангалуун байна” гэж тодотгож байв. Тэгэхэд нь Г.Сайханбаяр генерал ч хариуцлагатай ажиллана гэдгээ цэрэг хүний хувиар нэр төртэйгөөр хэлж байсан. Мань хоёр цэргийн сургуульд хамт номын дуу сонсож байсан эртний андууд гэгддэг. Нэг нь өнөөдөр Ерөнхийлөгч Монгол Улсын Зэвсэгт хүчний Ерөнхий командлагч, нөгөөх нь Батлан хамгаалахын сайд болсон ангижавууд Монголын армид ёстой дураараа дургиж байгааг өөр олон жишээнээс харж болно.

Тэдний үед хурандаа цолтой бүхэн генерал болдог болох нь. Г.Сайханбаяр сайд болсноор газар, хэлтсийн дарга нар хүртэл генерал болдог жишгийг харуулж байна. Энэ бол Монголын армийн түүхэнд урьд өмнө байгаагүй үзэгдэл. Хоёр нийгмийн үед нийлээд 180-аад генерал төрж байв. Харин сүүлийн үед улиралд л тав таваар нь генерал төүүлдэг жишиг тогтоолоо, тэд.

Үүгээр зогсохгүй Г.Сайханбаяр сайд дайн өдөөгч ОХУ-ын цэрэг, зэвсгийг хээрийн сургууль нэрийн дор эх орондоо залсан. Уг үйлдлээрээ манай улс ОХУ-ыг дэмжиж байгаа мэт ойлголтыг дэлхий дахинд өгчихлөө. Г.Сайханбаяр сайдын алдаатай, мэдрэмжгүй бодлогын уршгаар армид алба хаах хүнгүй, дайн үүсгэсэн орны өнгөнд авчирлаа. Батлан хамгаалахын салбарыг дампууруулж байгаа Г.Сайханбаяр бол яах аргагүй явах ёстой сайдын тоонд орно.

ӨДРИЙН СОНИН: Мөнхжаргалын МӨНХЦЭЦЭГ