Хөгжлийн банкны олгосон зээлийн багцад эзлэх чанаргүй зээлийн үлдэгдэл нийт зээлийн 57% буюу 1.8 их наяд төгрөгт хүрээд байсан. Тэгвэл үүнээс 514.5 тэрбум төгрөгийн зээлийг энэ сарын байдлаар эргэн төлүүлээд байгаа юм. Түүнчлэн хөгжлийн банкнаас зээл аваад эргэн төлөөгүй, зээл олголтод хууль бусаар нөлөөлсөн гэх 79 хүний хэргийг АТГ-аас шалгаж дуусаад шүүх рүү шилжүүлсэн. Үүнд УИХ-ын гишүүн Г.Амартүвшин, Х.Ганхуяг, Ё.Баатарбилэг гэх мэт хүмүүсийн нэр багтаж байгаа төдийгүй Монгол банкны Ерөнхийлөгч Б.Лхагвасүрэнгийн нэр мөн нэмэгджээ.

Тодруулбал Монгол банкны Ерөнхийлөгч Б.Лхагвасүрэн “Бэрэн групп” ХХК-д зээл олгосон асуудлаар яллагдагчаар татагдан, шалгуулж байна. “Бэрэн групп” ХХК нь Хөгжлийн банкнаас 33.2 тэрбум төгрөгийн зээл аваад, эргүүлэн төлөөгүй бөгөөд захирал Б.Мөнхтөрийг нь хуулийн байгууллагад шалгаж байна.