Улс төрийн намын бүрэн эрхшээлд орж, төрийн үндсэн чиг үүргийг уландаа гишгэсэн шившигийн хөндий рүү Монгол Улсын АТГ туугдан орж байна. Харамсалтай. Даяаршил эрч хүчээ авсан сүүлийн 20-иод жилд дэлхийн улс гүрнүүдийн харилцаанд урьд өмнө байгаагүй нэн таатай нөхцөл бүрдэж, хөгжил дэвшлийн сайхан бололцоо нээгдсэн боловч үүнийг дагасан сөрөг үзэгдлүүд мөн даяаршиж байна. Тэдгээрийн нэг нь авлига юм. Энэ сөрөг үзэгдэлтэй зөвхөн нэг улс дангаараа тэмцсэнээр үр дүнд хүрэхгүй, харин олон улсын түвшинд хамтран тэмцэхээс өөр аргагүйг харгалзан 2003 онд Нэгдсэн Үндэстний Байгууллагаас Авлигын эсрэг конвенцийг баталсан билээ. Монгол улс 1996 онд Монгол Улсын Их Хурал Авлигын эсрэг хууль, 2002 онд Авлигатай тэмцэх Үндэсний хөтөлбөрийг баталж, Үндэсний хөтөлбөрийг хэрэгжүүлэх ажлыг зохицуулж, хяналт тавих орон тооны бус Үндэсний зөвлөлийг байгуулж ажиллуулсан. 2002 онд Авлигатай тэмцэх Үндэсний хөтөлбөрийг баталж, 2006 оны 7 дугаар сарын 6-ны өдөр.

Монгол Улсын Их Хурал Авлигын эсрэг хуулийг шинэчлэн баталж, 2006 оны 11 дүгээр сарын 1-ний өдрөөс эхлэн даган мөрдөж эхлэв. Авлигын эсрэг хуулийн дагуу Монгол Улсад анх удаа авлигатай тэмцэх тусгай байгууллага-Авлигатай тэмцэх газар байгуулагдан 2007 оны 1 дүгээр сарын 11-ний өдрөөс эхлэн үйл ажиллагаагаа явуулж эхлэв. Авлигатай тэмцэх газар нь авлигын эсрэг олон нийтийг соён гэгээрүүлэх, авлигаас урьдчилан сэргийлэх, авлигын гэмт хэргийг илрүүлэх зорилгоор гүйцэтгэх ажил, хэрэг бүртгэлт, мөрдөн байцаалт явуулах, энэ хуульд заасан этгээдийн хөрөнгө, орлогын мэдүүлгийг хянан шалгах чиг үүрэг бүхий хараат бус, бие даасан, төрийн тусгай байгууллага хэмээн олон нийт итгэж найддаг.

Гэтэл 2022 оны 12-р сарын 13-ны өдөр АТГ-ын тодорхой тооны албан тушаалтнууд бусдыг гэм буруутай нь эцэслэн тогтоогдоогүй байхад гэмт хэрэгтэн мэтээр олон нийтэд нэр заан уншсан нь тэд эрх баригч намын харалган улс төрийн золиосонд түүхэн хугацааныхаа турш явуулж ирсэн үйл ажиллагааныхаа үндсэн чиг үүргээс илт гажиж, хэлмэгдүүлэлтийн хэрэгсэл болж мэдэх хэмжээний үйлдлийг итгэл муутай гүйцэтгсэн нь туйлын хайхрамжгүй, харамсалтай хэрэг боллоо.

Ийнхүү дэлхийн авлигын эсрэг үзэл санаанд нэгдсэн он цагаас хойш хараат бусаар ажиллахыг урьтал болгосоор асан АТГ эрх баригч нам, түүний доторх улс төр, эдийн засгий явцуу бүлэглэлийн гараар үгүй боллоо. Гүн эмгэнэл илэрхийлье. Авлигатай тэмцэх газрын эрхэм зорилго Авлигатай тэмцэж, шударга ёсыг тогтоон хөгжил дэвшилд хүргэх, нэгдмэл удирдлагатай, бие даасан байх бөгөөд үйл ажиллагаандаа Авлигын эсрэг хуулийн 16 дугаар зүйлд заасан хууль дээдлэх, хараат бус, ил тод байх, нууцыг чанд сахих зарчмыг баримталсаар ирсэн үе үеийн удирдлагууд, хууль сахиулагч нарын олон жилийн ажлын үр дүн нуран унах ёсгүй. Та бүхэнд ард түмэн итгэж найдсаар ирэв.