Японы нийслэл Токио хотын эрх баригчид тус хотын 18-аас доош насны бүх хүүхдэд сар бүр 5000 иен олгохоор төлөвлөж байгаа талаар тус улсын хэвлэлүүд мэдээлжээ. Өрхийн орлогоос үл хамааран хүүхэд бүрд олгох энэхүү мөнгөн тэтгэмжийг 2023 оны санхүүгийн жилээс олгож эхлэх бөгөөд одоогийн байдлаар 1.93 сая хүүхэд энэ мөнгөн тэтгэмжид хамрагдах аж. Энэхүү арга хэмжээ нь төрөлт эрс буурч буйг зогсоох зорилготой тул Токиогийн эрх баригчид шаардлагатай санхүүжилтийг төсөвт суулгахаар ажиллаж байна. Японы 2023 оны санхүүгийн жил нь дөрөвдүгээр сарын 1-нээс эхэлнэ. Токио хотын дарга Юрико Коике лхагва гарагт иргэддээ шинэ жилийн мэндчилгээ дэвшүүлэхдээ, өнгөрсөн онд төрсөн хүүхдийн тоо урьдчилан тооцоолж байснаас 11 жилийн өмнө 800 мянгаас доошилж буурсныг дурдаад энэ нь нийгмийн үндэс суурийг ганхуулж буй цочирдмоор нөхцөл байдал болохыг тэмдэглэсэн байна. “Бид энэ асуудлыг дахин хойш тавих эрхгүй. Токио хот тодорхой арга хэмжээнүүдийг шинээр санаачлан хэрэгжүүлж, түүчээлэн ажиллах болно” гэж тэрбээр онцолжээ.