Японы ерөнхий сайд Фүмио Кишида барууны орнууд дахь айлчлалаа өчигдрөөс эхлүүллээ. Тэрбээр дэлхийн хоёрдугаар дайнаас хойшхи хамгийн том цэргийн бүтээн байгуулалтыг улсдаа хийнэ гэж зарласныхаа дараа ийн “Их-7”-ийн орнуудад айлчлах болжээ.

“Их-7”-ийн дээд хэмжээний уулзалт тавдугаар сард болно. Бүлгийн тэргүүний хувьд тус уулзалтыг зохион байгуулах Кишида энэ удаагийн айлчлалаараа эдийн засгийн аюулгүй байдал, Орос, Украины нөхцөл байдал, Хятад, Хойд Солонгосын хурцадмал байдал зэрэг олон улсын асуудлыг өргөн хүрээнд авч хэлэлцэнэ.

Тухайлбал, АНУ дахь айчлалын хүрээнд хоёр талын батлан хамгаалах гэрээ, Хятадын дэвшилтэт хагас дамжуулагчийг ашиглах боломжийг хязгаарлах хүчин чармайлт зэрэг асуудлыг хэлэлцэхээр болжээ. Харин Их Британитай хоёр талын зэвсэгт хүчнээрээ харилцан айлчлах эрх зүйн орчныг бүрдүүлэх гэрээнд гарын үсэг зурах төлөвтэй байна.