Сүхбаатар дүүргийн Эрүүгийн хэргийн анхан шатны шүүхээс “Хөгжлийн банк”-ны гэх эрүүгийн хэргийн урьдчилсан хэлэлцүүлгийг өнөөдөр зохион байгуулж байна. Уг хуралдааныг “Шүүх хуралдааныг шүүхийн байрнаас бусад газарт хийх нийтлэг журам”-ын дагуу хэргийн оролцогчид багтахуйц танхим болох Улаанбаатар чуулгын байранд зохион байгуулж байгаа юм

Шүүхийн урьдчилсан хэлэлцүүлэгт яллагдагч 80 хүн, дөрвөн хуулийн этгээд, прокурор зургаа, өмгөөлөгч 106, гэрч 28, хохирогчийн төлөөлөгч хоёр, шинжээч 10, хууль ёсны төлөөлөгчид 15, нийт 257 хэргийн оролцогч оролцох ёстой байсан юм. Шүүх хуралд ирэх ёстой бүх хүмүүс ирээгүй ч маш өргөн бүрэлдэхүүнтэй шүүх хурал болж байна. Тухайлбал, 100 гаруй өмгөөлөгч оролцож байгаа юм.

Шүүхийн ерөнхий зөвлөлөөс Хөгжлийн банкны шүүх хурлыг нээлттэй явуулах шийдвэр гаргасан. Гэвч өмгөөлөгч нар "Хувь хүний нууцад хамаарах мэдээлэл яригдах учраас шүүх хурлыг хаалттай явуулж өгнө үү" хэмээн хүсэлт гаргалаа. Шүүх хуралд оролцож буй прокурорууд ч тэдний саналыг дэмжиж байгаагаа илэрхийлсэн юм. Улмаар шүүгчид зөвлөлдөөд шүүх хурлыг хаалттай явуулах нь зүтэй гэж үзлээ. Ингэснээр шүүх хурал хаалттай үргэлжилж байна.

Хөгжлийн банкны шүүх хуралд оролцох ёстой 80 хүний дотор Н.Алтанхуяг, Г.Амартүвшин, Ё.Баатарбилэг, Х.Ганхуяг гэх мэт хэд хэдэн УИХ-ын гишүүн бий. Гэтэл УИХ-ын гишүүн Н.Алтанхуяг л ганцаараа шүүх хуралд биечлэн оролцож байна. Шүүх хуралд оролцож буй зарим өмгөөлөгч "Дархан эрхтэй УИХ-ын гишүүд яагаад шүүх хуралд биечлэн ирж оролцохгүй байгаа юм бэ" хэмээн шүүмжилж байлаа.

Шүүх хурлын завсарлагааны үеэр УИХ-ын гишүүн Н.Алтанхуяг "10-аад жилийн өмнө гаргасан Засгийн газрын тогтоолтой холбоотойгоор намайг шүүхэд дуудсан. Тэр тогтоол дээр нь Хөгжлийн банк гэсэн үг үсэг ч байхгүй л дээ. Би энэ 80 хүнтэй нийлээд байх шаардлага байхгүй. Засгийн газрын тогтоол гэдэг чинь авлига өгнө, авна гэдгээс ангид асуудал. Улс төрийн шинжтэй юм явж байгаа болохоор намайг сүргийн толгойлогч болгож байга юм болов уу гэж бодож байна. 2019 онд үүссэн хэрэг юм билээ. УИХ-аар бүрэн эрхээс түдгэлзүүлэх тухай асуудал оруулахаасаа хоёрхон хоногийн өмнө намайг дуудаад яллагдагч болгочихсон. Би уг нь 2016-2020 онд хэзээ ч дуудсан очихоор чөлөөтэй байсан" гэлээ.