БНХАУ Украины хямралыг улс төр, яриа хэлэлцээний аргаар шийдвэрлэх тухай 12 зүйлтэй энхийн төлөвлөгөө санал болгож байна. Өөрөөр хэлбэл Орос, Украины хооронд гал зогсоож, нөхцөл байдлыг аажмаар намжаах нь энхийн хэлэлцээнд суух замыг засна гэж Бээжин үзэж байна.

Хятадын засгийн газар ОХУ-д тавьсан Өрнөдийн хоригийг цуцлах, цөмийн зэвсэг хэрэглэхгүй байх, энгийн иргэдийг дайны фронтоос гаргах хүмүүнлэгийн коридор нээхийг дайтагч талуудад санал болгож байна. Хятад улс хоёр тал нөхцөл байдал хяналтаас гарахаас урьдчилан сэргийлэх, цөмийн дайн ч хийж болохгүй, биологийн болон химийн зэвсэг үйлдвэрлэх, хэрэглэхгүй байх, НҮБ-ын аюулгүйн зөвлөлөөр батлагдаагүй, нэг талыг барьсан хориг арга хэмжээ авахгүй байх, үр тарианы экспортын гарцыг аюулгүй болгох нь зүйтэй гэдгийг 12 зүйлт төлөвлөгөөндөө тусгажээ.

Мөн бүх улс орны бүрэн эрх, тусгаар тогтнол, нутаг дэвсгэрийн бүрэн бүтэн байдлыг хүндэтгэх ёстой, нэг улсын аюулгүй байдлыг нөгөө улсынхаар зольж болохгүй, бүс нутгийн аюулгүй байдлыг өргөжин тэлэлт, цэргийн эвслийг өргөжүүлэх замаар хангаж болохгүй гэсэн зүйлүүдийг уг төлөвлөгөөнд тусгасан байна. Украины засгийн газар Хятадын засгийн газраас энх тайван тогтоохын төлөө өөрийн санаачилгыг дэвшүүлж байгаа нь сайны дохио, Дайныг зогсоохын төлөөх дэлхий нийтийн хүчин чармайлтад Бээжин оролцоотой байх сонирхлыг илэрхийллээ гэж сайшаан хүлээн авчээ.

Мөн Хятад улс Украинаас цэргээ гаргахыг Орос улсад уриална гэж найдаж байгаагаа Киев илэрхийлсэн байна. Хятадын засгийн газар Москватай ойр түншлэх болсныхоо төлөө Америк болон түүний холбоотнуудаас ихээхэн зэмлэл хүртэж байгаа.

Иймээс Москватай харилцаагаа тэнцвэржүүлж, Өрнөдтэй харилцаагаа хадгалахын төлөө байгаа Бээжингийн энэ төлөвлөгөө бол өөрийгөө төвийг сахисан энх тайвны зуучлагч гэсэн өнцгөөр харуулах гэж чармайлтынх нь нэг хэсэг гэж Өрнөдийнхөн дүгнэж байна.

Сүүлийн үед Хятад улс Орос улсад байлдааны зэвсгээр туслах гэж байна гэж Өрнөдийнхөн болгоомжилж байгаа. Харин Бээжин үүнийг няцаагаад байна.

Нийтэлсэн: Moнголын мэдээ