Нийгмийн сүлжээнд олон дагагчтай олны танил хүмүүс онлайнаар сугалаа зохион байгуулж автомашин борлуулдаг болсон. Тухайлбал МУГЖ М.Баярмагнай приус автомашин болон шүдлэн үхэр хожих сугалааг зохион байгуулж нэлээдгүй иргэдээс 20 мянган төгрөг босгосон бол дуучин Н.Заяа нь автомашин бусад эд зүйлээ сугалаагаар худалдан борлуулж байгаа нь иргэдийн мэдээлэлгүй байдлыг ашиглаж байна. Хэдийгээр иргэд өөрсдөө сайн дураараа өгч байгаа ч эргээд энэ нь хууль зөрчсөн үйлдэл юм.

Тодруулбал Энэ төрлийн үйл ажиллагаа явуулахын тулд Сангийн яамнаас зөвшөөрөл авсан байх шаардлагатай. Харин тус яамнаас зөвшөөрөл авахын тулд тодорхой шаардлагуудыг хангасан байх ёстой. Үүнд:

– Сугалааны үйл ажиллагаа эрхлэх төсөл

– Тухайн байгууллага өөрийн үйл ажиллагаанд аудит оруулж санхүүгийн тайлан хийлгэсэн байх

– Татварын албанаас өр төлбөртэй эсэх талаар лавлагаа

–Санхүүгийн чадвартай байх

– Сугалаа гаргаснаар ямар хэмжээний борлуулалт хийж, ашиг олох талаарх судалгаа

– Баталгаажуулсан тасалбарын хэмжээ гэх мэт маш нарийн шалгууртай байдаг.Гэтэл цахим орчинд олон дагагчтай гэдгээ ашиглан иргэдээс тодорхой хэмжээний мөнгийг шилжүүлэн авч тэр автомашин хожлоо хэмээн шоу тоглох нь хэрээс хэтэрлээ.

Нэг үгээр хэлбэл иргэд хууран мэхлэгдэж хууль бус сугалаанд оролцож байгаа гэсэн үг юм. Нөгөөтээгүүр иргэдийн зүгээс өөрсдөө мэдлэг мэдээлэлгүй, амар хялбар аргаар мөнгө олох гэсэн хүслээсээ болж эдгээр олны танил эрхмүүдийн бэлэн “хоол” нь болж байна. Тиймээс тэдний нэг нь 461-рүү ачигдахаас өмнө иргэд ч тэд ч энэ үйлдлээ зогсоох хэрэгтэй байна. Цаашлаад хууль бус энэ үйлдэлд хууль хяналтын байгууллага нь анхаарлаа хандуулах хэрэгтэй байна.