Иран улс цөмийн гэрээнд зааснаасаа 18 дахин их хэмжээний уран баяжуулсан гэж Олон улсын атомын энергийн агентлаг мягмар гарагт зарлажээ. Тус агентлагийн мэдээлснээр Иран улсад гэрээгээр хүлээн зөвшөөрсөн баяжуулсан ураны хэмжээ 202.8 килограмм хэдий ч өдгөө энэ нь хэтэрч, 3 тонн 760 килограмм болсон гэнэ.

Түүнчлэн Олон улсын атомын энергийн агентлагийн шинжээчид Ираны цөмийн объектоос 83.7 хувь хүртэл баяжуулсан уран илрүүлсэн байна. Энэ нь цөмийн бөмбөг үйлдвэрлэхэд бараг бэлэн болсон гэсэн үг. Цөмийн зэвсэг бүтээхэд ураныг 90 хувиар баяжуулах шаардлагатай байдаг гэж “Франс Пресс” агентлаг дамжуулжээ.

Олон улсын атомын энергийн агентлаг, Иран улс баяжуулсан ураны хэсэг хаанаас гарч ирсэн талаар хэлэлцэж байгаа тухай тайланд дурдсан байна.

Тегераны хувьд 60-аас дээш хувиар баяжуулсан гэдгээ үгүйсгэсэн хэвээр байна. Исламын Бүгд Найрамдах Улсын Атомын энергийн байгууллагын албан ёсны төлөөлөгч Бехруз Камальванди “Ураныг 60-аас дээш хувиар баяжуулах оролдлого одоогоор хийгээгүй” гэж мэдэгджээ.

Тэгвэл үүнтэй зэрэгцээд Пентагон Ираныг атомын бөмбөг үйлдвэрлэх техникийн боломж бүрдсэн болохыг зарласан байна. Тус улсад нэг цөмийн бөмбөг үйлдвэрлэхэд 12-хон өдөр хангалттай гэж АНУ-ын Батлан хамгаалахын дэд сайд Колин Каль Төлөөлөгчдийн танхимд хийсэн сонсголынхоо үеэр мэдэгджээ.