Хүн төрөлхтөн хөдөлмөрлөж, бүтээснийхээ хэрээр эрэлт хэрэгцээгээ хангах хэрэгсэл буюу мөнгийг олж болдог тогтолцоонд ороод олон зуун жил болжээ. Боолын нийгэмд эздийнхээ ашиг орлогыг төлөө хөлс хүчээ шавхах зарчим үйлчилдэг бол эрх чөлөөт, шинэ нийгмийн төлөвшил хөгжил бий болсоор багагүй цаг түүхийг ардаа орхисон ч орчин үеийн боолчлол арай өөр өнгө төрхтэй болжээ.

Өөрөөр хэлбэл санхүүгийн заль мэх хэрэглэн ард түмнийг далд хэлбэрээр боолчилдог бохир бүтэц төрийн өндөр дээд албан тушаалтнууд тэднийг дагасан мунхаг улс төрчид, төрийн үйл ажиллагааны хэрэгжилтэд хувьдаа давуу эрх олохоор улс төрийг худалдаж авдаг авлигалчдаас үүдэлтэй тэгш бус байдал дэлхийн олон оронд цэцэглэн хөгжсөн ч өдгөө ийм балагтай, бүдүүлэг байдал төгсгөлдөө ирж байх шиг.

Хүн амын ихэнх хэсэг нь амьжиргааны түвшин сул, иргэдийн гар дээрээ авч байгаа цалин орлого сарын хоол, хүнс, хувцас хунарын хэрэглээнд ч хүрэхгүй шахам байдалд дасч ээнэгшсээр байсан монголчууд цар тахал, дайн гэх мэтийн гадаад хүчин зүйлсийн нөлөөллөөр улам хөөргөдөж яран дээр шарх нэмж байгаа үнийн өсөлт, төгрөгийн ханшийн сулралыг бууруулах ажил хийж чадахгүй байгаа төр засгийг хурцаар шүүмжилж олон зуун жил тэмцэн олсон эрх чөлөө, тусгаар тогтнолынхоо улс төр нийгмийн үндсэн суурь эрхийг шорон гяндан, хэлмэгдүүлэлтээс ч эмээлгүй үгээ хэлж, үзэл бодлоороо амьсгалах болжээ.

Ард түмний наад захын хүсэл эрмэлзэл эх орондоо элэг бүтэн, амар тайван, гэдэс цатгалан, мөр бүтэн амьдрах. Гэтэл ийм боломж үнэндээ алга. Жирийн иргэдийн цалин орлого сардаа дөнгөн данган арай гэж хүрэлцдэг байсан бол өдгөө хүрэхээ ч больж зээлийн хүүд идэгдэн нам зогсож байсан эдийн засаг иргэдийн амьжиргааны үзүүлэлтээс авч үзвэл сульдан унаж, өр ширэндээ өм цөм идэгдсээр.