Монголд шударга бус зүйл захаасаа аваад олон ч зарим хэтэрхий гэмээр асуудлууд улам олон болсоор . Хөгжлийн банкны зээлээ хугацаа хэтрүүлсэн олигархууд, ЖДҮ-ийн сангаас өөртөө давуу байдал бий болгосон улс төрчид, төрийн өмчийн газруудаас хувьдаа завшигч дарга нарт шийтгэл ногдуулахдаа үсрээд л албан тушаалаас нь огцруулж, хохирлыг гүйцэт нөхөн төлүүлсэн эсэх нь ч тодорхойгүй замхруулдаг жишээ түм бум байхад үнийн өсөлт, татварын дарамтад дарлуулсан иргэдийг СӨХ-ны мөнгөө төлөөгүйн төлөө бүх талаар хавчих хар жагсаалтад оруулах нь шударга бус.

Хар жагсаалтыг тодорхой журмаар хийх, төлөгдөөгүй байгаа цаад учир шалтгаанд нь уялдуулсан заалтууд оруулах хэрэгтэй. Зээлээ төлөөгүй ямар нэг төлбөрийн цаана төлөх боломжгүй шалтгаан нь удаан хугацаанд үргэлжилсэн бол тэрийг нь харгалзан үзэх, харин төлөх чадамжтай хэр нь албаар төлдөггүй хүмүүс байвал тодруулж ажиллах гэх мэтийн ухаалаг зохицуулалтууд хэрэгтэй.

Иргэдийн сэтгэгдлүүдэд зонхилж байгаа нэг агуулга бол “СӨХ байгаа үгүй нь мэдэгдэхгүй, байрны засвар үйлчилгээ, цэвэрлэгээ гэх мэтийн асуудлууд үргэлж чанаргүй, муу байдаг...” гэжээ. Ямар нэг асуудлыг жижиг гэлтгүй судалгаатай, ухаалаг, боловсон арга барилаар шийдэхэд суралцахгүй бол “...СӨХ-ны мөнгөө төлөөгүй бол хар жагсаалтад оруулна, лифтэнд суулгахгүй...” гэх мэтийн диктатурын хандлагаасаа салаагүй бурангуй арга барил иргэдийн нуруун дээрх ачааг улам л нэмэх нь дээ.

СӨХ-ны үйл ажиллагаа ажил гүйцэтгэлийн тайлантай , зах зээлийн судалгаатай, улирал бүр засвар үйлчилгээ явуулдаг... гэх мэтийн сайнаар үнэлэгдэхээр байвал оршин суугчид сэтгэл ханамжтай төлбөр, хураамждаа ч хойрго хандахгүй болов уу? Харин эл харилцааг зохицуулахдаа бүдүүлэг механикаар хандвал иргэд л улам хохирох болно.