Боловсролын салбарын бурангуйдлыг нэг илрэл эцэг эхчүүдээс элдэв хандив, баярын арга хэмжээ нэрээр мөнгө татдаг байдал амь бөхтэй хэвээр. Монгол Улсын хууль, боловсролын байгууллагуудын холбогдох журмын дагуу сайн дурын үйл ажиллагаа зохион байгуулах эрх нээлттэй ч далимдуулан эцэг эхийн зөвлөл гэх хэдэн хүн ангийн багштай нь хуйвалдах замаар эцэг эхчүүдээс мөнгө татдаг түгээмэл жишээ бий.

Зарим орон нутгийг удирдлагууд энэ байдлыг зогсоох зарим арга хэмжээ авч эхэлсэн.

Тухайлбал Увс аймгийн засаг дарга Ц.Гантөмөр эцэг эхчүүдийн дунд зохиогддог спортын арга хэмжээнүүд нь архидан согтуурах, заавал оролцоог хангахыг шаардах мэтээр хууль журам зөрчих асуудал байгаа учраас ийм төрлийн арга хэмжээг цуцалсан байна. Улсын сургуулиудад тулгардаг хамгийн том бэрхшээл нь ажиллах орчин, хангамжийн асуудал. "Гэрлийн шил хагарчихлаа солих хэрэгтэй байна. Ангид засвар шаардлагатай байна. Шинээр ийм ном худалдан авах хэрэгтэй байна.

Ангийн хуримтлал үүсгэх хэрэгтэй байна". Амны уншлага болсон энэ үгийг улсын сургуулийн багш нар сурагчдадаа хэлэх нь олон.

Ийм тайлбарын араас ойрын хугацаанд багтаан аав, ээжээсээ тодорхой хэмжээний мөнгө авчрахыг сануулна. Төсөвгүй гэх нэрийдлээр эцэг, эхчүүдээс их хэмжээний мөнгө татах асуудал нь эцэг, эхчүүдэд санхүүгийн хүнд дарамт болж байгааг онцолъё. Цаашлаад УИХ-ын гишүүд өөрсдийн суух орчинд ихэд анхаарч 2024 оны төсөвт төрийн ордны засвар үйлчилгээнд 12 тэрбум төгрөг тусгаад амжсан. Гэтэл сурагчдын анги тэнхим, ширээ, сандал засварлах, шинэчлэх ажил гаднын аль эсвэл эцэг, эхчүүдийн хандив тусламжаар хийгддэг тэгш бус байдлыг халъя.

Д.ЭНХБАТ