Монгол Улсын эдийн засаг 2023 онд 5.8 хувь, 2024, 2025 онд тус тус 6.2 хувь болон 6.4 хувиар өсөх төсөөллөө Дэлхийн банк сүүлийн тайландаа тусгалаа. Дэлхийн зах зээлд түүхий эдийн үнийн өсөлт саарах, хүнсний нийлүүлэлт сайжрах, инфляцын бодит төсөөлөл зэрэг хүчин зүйлсээс хамаараад Зүүн Ази, Номхон далайн бүс нутгийн ихэнх оронд инфляц бага зэрэг саарах төлөвтэй байна.

Хэдий тийм боловч бүс нутгийн Лаос, Монгол зэрэг улсад тодорхой хүчин зүйлсээс хамаараад инфляцын түвшин өндөр хэвээр хадгалагдах хүлээлттэйг анхааруулав. Тодруулбал: валютын ханшийн сулралт, импортын бараа, бүтээгдэхүүний үнэ өндөр байх зэрэг хүчин зүйлс нөлөөлөхөөр байгааг тодотгож байна.

Мөн 2022 оноос хойш чангарсан мөнгөний хатуу бодлого үргэлжлэх төлөвтэй байгаа нь эдийн засгийн ойрын өсөлтөд саад болохоор байгаа аж.

БНХАУ-д үйлдвэрлэл удааширч байгаа нь бүс нутгийн түүхий эд экспортлогчид, тэр дундаа Индонез, Монгол, Мьянмар, Соломоны арлуудад сөргөөр нөлөөлж түүхий эдийн эрэлт, үнийг бууруулахаар байна.