Хаврын тэргүүн сар, шинэ жилийн баяраа өргөн дэлгэр тэмдэглэдэг уламжлалтай Монгол түмэн энэ өдрүүдэд ах дүү, амраг садан айл хотлоороо цэнгэл баяраа хуваалцан байна. УИХ-ын гишүүд, улс төрчид ч завшааныг ашиглан сонгуулийн оноо цуглуулах ажилдаа шамджээ. Хэдий сонгуулийн тухай хуулиараа элдэв золголт уулзалт арга хэмжээ сурталчилгааны өдөр хоног эхлээгүй байхад хориотой ч энэ нь эрх мэдэлтнүүд УИХ-ын гишүүдэд хамаарахгүй. Гишүүний бүрэн эрхийн хүрээнд тайлан уулзалт хийх далимаар ард түмний сэтгэл санааг элдэв эрээн мяраан автуулахаар зүг зүгт мордоцгоожээ.

Улсын аварга, аймаг, сумын аварга малчдын шагналыг бараг орон нутгийн нэгж бүрд хэд хэдээр нь олгож хавтгайруулан тэр ёслол дээрээ өнөөх эрх дархтнууд дээл хувцсаараа нүдээ бүлтэртэл гоёод хөөрхий малчдыг сандарган телевизийн кино багтай шахам явцгааж өөрсдийгөө баахан сурталчлах ажлыг амжуулав.

Мал аж ахуй, нүүдэлчин өв соёлоо хамгаалах, хөгжүүлэх , өвлүүлэхэд төрөөс тогтвортой нэгдсэн бодлого хэрэгжүүлээгүйн уршгаар говь нутаг цөлжих эзгүйрч, хангайдаа зуд зурсан нүүрлэн ихэнх малчдын амьдрал ахуй тун хүнд ба залгамжлах залуу хойч үегүй идэр үеийнхэнд бодит үр ашиг тааруу хэвээр л. Гэтэл социалист системийн үлдэгдлийг гааруулах мэт элдэв төмөр, тууз, хоосон алдар гавьяагаар хөөргөдөн сонгууль дөхөхөөр л гэнэтхэн мал ахуйдаа хайртай, малчин уг удмаа гэх чин сэтгэлтнүүд борооны дараах мөөг шиг олширдог гаж үзэгдэл ажиглагддаг.

Д.ЭНХБАТ