Сар шинийн өдрүүдийн гэмт хэрэг, зөрчил, эрүү, хэв журам, авто замын нөхцөл байдлын талаар Цагдаагийн байгууллагаас өнөөдөр мэдээлэл хийлээ.

Нийтийн хэв журам хамгаалах албаны дэд бөгөөд захиргаа удирдлагын хэлтсийн дарга хурандаа Н.Амарсанаа” Сар шинийн өмнөх өдрүүдэд олон нийтийн цахим сүлжээгээр дамжуулж иргэдэд хаана үйлдвэрлэсэн нь тодорхойгүй хуурамч архи хууль бусаар худалдаалах зөрчил нэмэгдсэн. Иймд цагдаагийн байгууллагаас уг хэрэгтэй холбоотой 96 фэйсбүүк хаяг, худалдан борлуулах зорилгоор нээсэн 74 группийг илрүүлж хяналт шалгалтын ажил зохион байгуулсан. Шалгалтын үр дүнд 250 орчим зөрчлийг илрүүлж 5 500 орчим хуурамч архийг хураан авсан. Түүнчлэн хямд үнээр архи зарж байсан нэр бүхий зургаан архины үйлдвэрт шалгалт хийж зарим зөрчлийг илрүүлсэн. Иймд иргэдийг баталгаагүй, хаана үйлдвэрлэсэн нь тодорхойгүй согтууруулах ундаа худалдаж авахгүй байхыг Цагдаагийн байгууллагаас зөвлөж байна” гэлээ.