Ерөнхий сайдыг бурханчилсан нэвтрүүлэг МҮОНТ-ээр цацагдах боллоо. Удирдагч хүн өөрийгөө магтуулж, түүндээ их мөнгө хүч цаг зав зарцуулаад эхлэхээр улс орон дарангуйлал руу эргэлтгүй урсаад орчихдог. МАН-ын дарга, Монгол Улсын Ерөнхий сайд Л.Оюун-Эрдэнэ Монгол Улсын Засгийн газрын тэргүүний албан тушаалд зориулагдан төрж, түүнийг эл сэнтийд ээж аав нь хүртэл хүмүүжүүлж, одоо түүнийг үгсэн магтагч нар ч” төрмөл сайддаа” төрсөн биеэсээ ч илүү хайр зарлах. 80 оны залуу гэгдэх Ерөнхий сайд маань авлигатай тэмцэх амлалт өгч байсан нь үнэн. Багагүй ахиц гарсан нь ч байх.

Гэхдээ тэр хүнээс илүү төрж, бусдаас илүү боловсорч, бурхан заяанд төрчихсөн болохоороо үүнийг хийгээгүй. Зүгээр л ээлжээ хүлээж байдаг богинохон настай гүйцэтгэх засаглалын тэргүүнээр одоо болтол ажиллаж байгаа нь улс төр, нийгэм цаг үеийн шаардлага.

Хэрвээ өр шир, өвчин зовлон авлига хээл хахууль, ядууралдаа баригдаад буй Монголын хувь заяаг хэн нэгэн зориг золиос хоёроороо эргүүлэхгүй бол үр хүүхэд хойч ирээдүй ямар хувь заяатай нь ойлгомжгүй. Оюун-Эрдэнэ чин шударгаар ард түмний талд бат зогсож байв уу? Гэвэл тийм биш. Тэр нэгэнт хүчрэгдэхээсээ өнгөрөөд буй асар их мөнгөний сүлжээний эзэдтэй тохиролцох замаар өдий болтол замаа бөхөлсөн хэрэг. Бодит байдал хэрхэн өөрчлөгдөхийг таашгүй ч үнэндээ ч авлигачид айж эхэлсэн ч айхдаа юу ч хийж мэдэхээр нөхцөл байдал үүсгэжээ. Ард түмний амин язгуур эрх ашгийг улс төрийн тохиролцоо, уушийн газрын ширээн дээр шийдвэрлэж болохгүй.

Д.ЭНХБАТ