Сөрөг хүчингүй арав шахам жил туйлсан эрх баригчид Үндсэн хуулийг удаа дараа өөрчлөн, сонгуулийн тогтолцоог ч эрс шинэчилсэн. Үр дүнд нь ямар төр тогтохыг шийдэх энэ удаагийн сонгуульд 26 нам 2 эвсэл өрсөлдөхөөр мөрийн хөтөлбөрөө Үндэсний аудитын газарт хүргүүллээ. Мөрийн хөтөлбөртөө бүсчилсэн хөгжлийн зарчим, амлалт өгөхгүй байх, байгалийн баялгаас хув хишиг тараах тухай бичихгүй байхыг эрх баригчдын зүгээс анхааруулж хуульд тусгасан. Харин улс төрийн намууд тун ч дуулгавартайгаар мөрийн хөтөлбөрөө батлуулахаар сэм сэм гэтэцгээх нь цаагуураа улс төрийн хатуу тохироо үйлчилж байх шиг. Монгол Улс сүүлийн жилүүдэд ардчиллын үнэт зүйлсээсээ үргэлж ухарч дарангуйллын дэглэм рүү зүтгэсээр буй.

Амлалт өгөхгүй гэж хуульд тусгасан атал МАН-ын нарийн бичгийн дарга А.Ариунзаяа “Ирэх сонгуульд МАН нэг хүнд ногдох ДНБ-ийг 10 мянган ам долларт хүргэнэ…” гэх зэргээр хэвлэлд яриад амжив. Цаагуураа МАН дахиад л ирэх сонгуульд ялалт байгуулж олонхоороо засаглана шүү гэж сануулах мэт. Нарийн бичгийн даргаасаа өгсүүлээд эрх баригч, төрийн өндөр албатнууд ч ирэх жилүүдэд байгалийн баялгийг яаж зарцуулах, ард түмнээс хэрхэн харамлах, сонгуулиас урьтаж хувьцааны ашиг гэгчийг хэрхэн дуншуулахаа хүртэл мэдэгдээд амжив.

Хууль төрийн түшээдэд ч жирийн иргэдэд ч эрх тэгш үйлчлэх учиртай. Даргын ярьсан болгон хуулиас давдаг гаж тогтолцоо бий болчихсон нь нууц биш. Тэр ч бүү хэл эрх баригчдыг шударгаар шүүмжилсэн нь шорон хаалга татахад хүрдэг бурангуй харанхуй нийгэмд гэрэл тусах цаг хэзээ вэ?

Энэ тухай зоригтой мэдэгдэл, байр суурь баримтлах ч сөхөөгүй улс төрд хэрхэн тэсэж үлдэн төрийн зөөлөн суудалд суухыг хүсэгчдийн арми үзэл баримтлал үнэт зүйлийг бус хувийн эрх ашгийг тангарга өргөхөө мэдээ ч үгүй үедээ л эрхэм болгож нийтийн сайн сайхны төлөө уянгын халил хууран мэхлэлтийн драм тавихаас хэтрэхгүй нам нэртэй бүлэг хамууд болжээ. Эрх баригчдын суганд эвтэйхэн хавчуулагдаж байгаад ямар ч аргаар хамаагүй төрд очиж дараа нь төсвөөс цулайхыг хүсэгчид, төрийн албыг шударга, ил тод, зарчимтай, хууль дээдэлдэг болгож улс орноо бүтээмжийн сэтгэхүйгээр жолоодохыг зүрх сэтгэлдээ тээж, үндэстнийхээ сэргэлтийг үнэт зүйлээ болгогчид хоёрын аль нь олон бэ?

Д.ЭНХБАТ